phir to har chehra nigahon se utar jata hai

phir to har chehra nigāhoñ se utar jaatā hai

jab yahāñ ḳhuun ke rishtoñ kā asar jaatā hai

jaane vāloñ ne to chhoḌā hai bahut kuchh lekin

paane vāloñ se sañjone kā hunar jaatā hai

khīñch lo hijr kī tasvīr kahāñ mumkin hai

aa.ina chhūT ke hāthoñ se bikhar jaatā hai

sar jhukātā huuñ to gir jaatī hai dastār mirī

aur dastār bachātā huuñ to sar jaatā hai

vo munāfiq hai mirā yaar nahīñ ho saktā

sub.h idhar aatā hai aur shaam udhar jaatā hai

phir se jal uThte haiñ ummīd ke ḳhāmosh diye

ek mazdūr sar-e-shām jo ghar jaatā hai

ek mūrat bhī mukammal nahīñ hone detā

roz miTTī vo na.ī chaak pe dhar jaatā hai

phir to har chehra nigahon se utar jata hai

jab yahan KHun ke rishton ka asar jata hai

jaane walon ne to chhoDa hai bahut kuchh lekin

pane walon se sanjone ka hunar jata hai

khinch lo hijr ki taswir kahan mumkin hai

aaina chhuT ke hathon se bikhar jata hai

sar jhukata hun to gir jati hai dastar meri

aur dastar bachata hun to sar jata hai

wo munafiq hai mera yar nahin ho sakta

subh idhar aata hai aur sham udhar jata hai

phir se jal uThte hain ummid ke KHamosh diye

ek mazdur sar-e-sham jo ghar jata hai

ek murat bhi mukammal nahin hone deta

roz miTTi wo nai chaak pe dhar jata hai