phir wahi raat phir wahi aawaz

phir vahī raat phir vahī āvāz

mere dil kī thakī huī āvāz

kahīñ bāġh-e-naḳhust se aa.ī

kisī koyal kī dukh-bharī āvāz

abhī chhāyā nahīñ hai sannāTā

aa rahī hai koī koī āvāz

phaḌphaḌāhaT kisī parinde kī

kisī koñpal kī phūTtī āvāz

abhī mahfūz hai tirā chehra

abhī bhūlī nahīñ tirī āvāz

mere bistar pe aa ke leT ga.ī

raushnī kī lakīr sī āvāz

muñh añdhere jagā ke chhoḌ ga.ī

ek sub.h-e-jamāl kī āvāz

din se fursat kabhī mile to suno

shaam kā saaz raat kī āvāz

gūñjtā hai abhī tarāna-e-shauq

vahī āhañg hai vahī āvāz

TeḌhe-meḌhe muḌe-tuḌe mukhḌe

TūTī-phūTī kaTī-phaTī āvāz

baḌe dukh jhiil kar kamā.ī hai

jo bhī hai ye burī-bhalī āvāz

phir wahi raat phir wahi aawaz

mere dil ki thaki hui aawaz

kahin bagh-e-naKHust se aai

kisi koyal ki dukh-bhari aawaz

abhi chhaya nahin hai sannaTa

aa rahi hai koi koi aawaz

phaDphaDahaT kisi parinde ki

kisi konpal ki phuTti aawaz

abhi mahfuz hai tera chehra

abhi bhuli nahin teri aawaz

mere bistar pe aa ke leT gai

raushni ki lakir si aawaz

munh andhere jaga ke chhoD gai

ek subh-e-jamal ki aawaz

din se fursat kabhi mile to suno

sham ka saz raat ki aawaz

gunjta hai abhi tarana-e-shauq

wahi aahang hai wahi aawaz

TeDhe-meDhe muDe-tuDe mukhDe

TuTi-phuTi kaTi-phaTi aawaz

baDe dukh jhil kar kamai hai

jo bhi hai ye buri-bhali aawaz