phir yaad aa gai kisi shirin-dahan ki baat

phir yaad aa ga.ī kisī shīrīñ-dahan kī baat

jis kī har ek baat hai sher-o-suḳhan kī baat

anjān ban ke hāl-e-ġham-e-dil na pūchhiye

aa jā.egī zabān pe zaḳhm-e-kuhan kī baat

sub.h-e-bahār lutf-e-suḳhan rañg-e-rū-e-gul

har husn meñ nihāñ hai tire bāñkpan kī baat

kyoñ andalīb chup hai sabā mājrā hai kyā

gulshan meñ ho rahī hai jo zāġh-o-zaġhan kī baat

dillī bahut hasīn hai dilkash hai lucknow

lekin ye aur hī hai hamāre dakan kī baat

sunte rahe zamāne kī kaḌvī kaḌī magar

kahne na paa.e 'tāhira' ham apne man kī baat

phir yaad aa gai kisi shirin-dahan ki baat

jis ki har ek baat hai sher-o-suKHan ki baat

anjaan ban ke haal-e-gham-e-dil na puchhiye

aa jaegi zaban pe zaKHm-e-kuhan ki baat

subh-e-bahaar lutf-e-suKHan rang-e-ru-e-gul

har husn mein nihan hai tere bankpan ki baat

kyon andalib chup hai saba majra hai kya

gulshan mein ho rahi hai jo zagh-o-zaghan ki baat

dilli bahut hasin hai dilkash hai lucknow

lekin ye aur hi hai hamare dakan ki baat

sunte rahe zamane ki kaDwi kaDi magar

kahne na pae 'tahira' hum apne man ki baat