phir zaban-e-ishq chashm-e-KHunfishan hone lagi

phir zabān-e-ishq chashm-e-ḳhūñfishāñ hone lagī

phir hadīs-e-dil sar-e-mahfil bayāñ hone lagī

phir kisī kī shoḳh nazroñ ne kiyā jhuk kar salām

phir mohabbat sāz-e-dil pe naġhma-ḳhvāñ hone lagī

phir kisī kī yaad aa.ī phir hue aañsū ravāñ

phir sitāroñ kī chamak dil par garāñ hone lagī

phir tasavvur meñ koī aane lagā hai bār-bār

phir mirī ummīd kī duniyā javāñ hone lagī

phir chaman meñ ġhuncha-e-nauras ne liiñ añgḌā.iyāñ

phir surūd-afzā bahār-e-gulistāñ hone lagī

phir pukārā chāñd-tāroñ ne mujhe shām-e-firāq

phir nigāh-e-shauq nazr-e-āsmāñ hone lagī

phir kisī kā dāman-e-rañgīñ hai merā haath hai

phir dil-e-pur-shauq kī hasrat ayaañ hone lagī

phir samāyā hai mirī nazroñ meñ vo māh-e-mubīñ

phir nigāh-e-dil javāb-e-āsmāñ hone lagī

phir ghaTā uThne lagī tauba ke phir laale paḌe

phir ḳhushāmad terī ai pīr-e-muġhāñ hone lagī

phir chalā dīvāna 'faizī' kū-e-jānāñ kī taraf

phir junūn-e-ishq kī hālat ayaañ hone lagī

phir zaban-e-ishq chashm-e-KHunfishan hone lagi

phir hadis-e-dil sar-e-mahfil bayan hone lagi

phir kisi ki shoKH nazron ne kiya jhuk kar salam

phir mohabbat saz-e-dil pe naghma-KHwan hone lagi

phir kisi ki yaad aai phir hue aansu rawan

phir sitaron ki chamak dil par garan hone lagi

phir tasawwur mein koi aane laga hai bar-bar

phir meri ummid ki duniya jawan hone lagi

phir chaman mein ghuncha-e-nauras ne lin angDaiyan

phir surud-afza bahaar-e-gulistan hone lagi

phir pukara chand-taron ne mujhe sham-e-firaq

phir nigah-e-shauq nazr-e-asman hone lagi

phir kisi ka daman-e-rangin hai mera hath hai

phir dil-e-pur-shauq ki hasrat ayan hone lagi

phir samaya hai meri nazron mein wo mah-e-mubin

phir nigah-e-dil jawab-e-asman hone lagi

phir ghaTa uThne lagi tauba ke phir lale paDe

phir KHushamad teri ai pir-e-mughan hone lagi

phir chala diwana 'faizi' ku-e-jaanan ki taraf

phir junun-e-ishq ki haalat ayan hone lagi