phirta hun bhaTakta koi rahbar nahin milta

phirtā huuñ bhaTaktā koī rahbar nahīñ miltā

hai vo nighrā us kā mujhe ghar nahīñ miltā

yārab maraz-e-ishq hai yā koī balā hai

chain is dil-e-betāb ko dam bhar nahīñ miltā

ham kis se kareñ da.ava-e-ḳhūñ kījiye insāf

maqtūl haiñ jis ke vo sitamgar nahīñ miltā

sab ārzūeñ dil kī ba-ḳhūbī nikal aa.eñ

tanhā vo kabhī ham se ghaḌī bhar nahīñ miltā

naqd-e-dil-o-jāñ nazr karūñ muft hī lekin

mujh ko mire Dhab kā koī dilbar nahīñ miltā

achchhā kiyā jo aa rahe āñkhoñ meñ hī vo 'faiz'

aisā kahīñ duniyā meñ unheñ ghar nahīñ miltā

phirta hun bhaTakta koi rahbar nahin milta

hai wo nighra us ka mujhe ghar nahin milta

yarab maraz-e-ishq hai ya koi bala hai

chain is dil-e-betab ko dam bhar nahin milta

hum kis se karen dawa-e-KHun kijiye insaf

maqtul hain jis ke wo sitamgar nahin milta

sab aarzuen dil ki ba-KHubi nikal aaen

tanha wo kabhi hum se ghaDi bhar nahin milta

naqd-e-dil-o-jaan nazr karun muft hi lekin

mujh ko mere Dhab ka koi dilbar nahin milta

achchha kiya jo aa rahe aankhon mein hi wo 'faiz'

aisa kahin duniya mein unhen ghar nahin milta