phirte hain ab bhi dil ko gareban kiye hue

phirte haiñ ab bhī dil ko garebāñ kiye hue

jin vahshiyoñ pe haiñ tire ehsāñ kiye hue

tajdīd-e-'ishq kyā ho ke barsoñ guzar ga.e

tujh se koī suḳhan bhī mirī jaañ kiye hue

ab tujh se kyā gila ho ke ik 'umr ho ga.ī

ham ko bhī qasd-e-kūcha-e-jānāñ kiye hue

dil se huī hai phir tire baare meñ guftugū

tar āñsuoñ se dīda-o-dāmāñ kiye hue

jī māntā nahīñ hai ki ham bhī bhulā chukeñ

terī tarah se vā'da-o-paimāñ kiye hue

kuchh zid meñ nāsehoñ kī tujhe chāhte rahe

kuchh pāsdārī-e-dil-e-nādāñ kiye hue

ham vo ki tujh ko she'r meñ tasvīr kar diyā

sūrat-garān-e-shahr ko hairāñ kiye hue

bāzār sard thā na ḳharīdār kam-nazar

ham ḳhud the apne aap ko arzāñ kiye hue

ai 'ishq ham se aur bhī hoñge zamāne meñ

achchhe-bhale gharoñ ko bayābāñ kiye hue

kuchh ham se nā-murād ki phirte haiñ kū-ba-kū

dil ko kisī faqīr kā dāmāñ kiye hue

vā'da kiyā thā us ne kisī shaam kā kabhī

ham aaj tak haiñ ghar meñ charāġhāñ kiye hue

ab us ke jaur se bhī ga.e ham ki jab se haiñ

apne kiye pe us ko pashemāñ kiye hue

ye ratjage qubūl ki ārām se to haiñ

rakhte the varna ḳhvāb pareshāñ kiye hue

ham vo asiir haiñ ki zamāne guzar ga.e

band apne aap par dar-e-zindāñ kiye hue

tark-e-vafā ke baa'd havas iḳhtiyār kī

is kārobār meñ bhī haiñ nuqsāñ kiye hue

jān-e-'farāz' marg-e-tamannā ke bāvajūd

bhūle nahīñ hamīñ tire ehsāñ kiye hue

phirte hain ab bhi dil ko gareban kiye hue

jin wahshiyon pe hain tere ehsan kiye hue

tajdid-e-'ishq kya ho ke barson guzar gae

tujh se koi suKHan bhi meri jaan kiye hue

ab tujh se kya gila ho ke ek 'umr ho gai

hum ko bhi qasd-e-kucha-e-jaanan kiye hue

dil se hui hai phir tere bare mein guftugu

tar aansuon se dida-o-daman kiye hue

ji manta nahin hai ki hum bhi bhula chuken

teri tarah se wa'da-o-paiman kiye hue

kuchh zid mein nasehon ki tujhe chahte rahe

kuchh pasdari-e-dil-e-nadan kiye hue

hum wo ki tujh ko she'r mein taswir kar diya

surat-garan-e-shahr ko hairan kiye hue

bazar sard tha na KHaridar kam-nazar

hum KHud the apne aap ko arzan kiye hue

ai 'ishq hum se aur bhi honge zamane mein

achchhe-bhale gharon ko bayaban kiye hue

kuchh hum se na-murad ki phirte hain ku-ba-ku

dil ko kisi faqir ka daman kiye hue

wa'da kiya tha us ne kisi sham ka kabhi

hum aaj tak hain ghar mein charaghan kiye hue

ab us ke jaur se bhi gae hum ki jab se hain

apne kiye pe us ko pasheman kiye hue

ye ratjage qubul ki aaram se to hain

rakhte the warna KHwab pareshan kiye hue

hum wo asir hain ki zamane guzar gae

band apne aap par dar-e-zindan kiye hue

tark-e-wafa ke ba'd hawas iKHtiyar ki

is karobar mein bhi hain nuqsan kiye hue

jaan-e-'faraaz' marg-e-tamanna ke bawajud

bhule nahin hamin tere ehsan kiye hue