phul chiKH uThte hain patton pe nami bolti hai

phuul chīḳh uThte haiñ pattoñ pe namī boltī hai

bel ke pinjre se jab shāḳh harī boltī hai

merī vus.at mire iz.hār ke aaḌe aa.ī

mujh samundar se ziyāda to nadī boltī hai

maiñ to chiḌiyā ko hī bulbul kī jagah likkhūñgā

ki mire ghar meñ to din-rāt yahī boltī hai

din mirā job kī bak-bak meñ guzar jaatā hai

aur shab-bhar ye kalā.ī kī ghaḌī boltī hai

ai khile phuul ke shaidā.ī tujhe ilm nahīñ

kitne zū-ma.anī tarīqe se kalī boltī hai

aañkh vaalo yuuñ mirī ḳhaak tamāshā na karo

sunñe vaalo ye mirī tez-ravī boltī hai

tū samajhdār agar hai to yahī kaafī hai

tujhe kahtī hai ki kyā hai mujhe jī boltī hai

phul chiKH uThte hain patton pe nami bolti hai

bel ke pinjre se jab shaKH hari bolti hai

meri wusat mere izhaar ke aaDe aai

mujh samundar se ziyaada to nadi bolti hai

main to chiDiya ko hi bulbul ki jagah likkhunga

ki mere ghar mein to din-raat yahi bolti hai

din mera job ki bak-bak mein guzar jata hai

aur shab-bhar ye kalai ki ghaDi bolti hai

ai khile phul ke shaidai tujhe ilm nahin

kitne zu-mani tariqe se kali bolti hai

aankh walo yun meri KHak tamasha na karo

sunne walo ye meri tez-rawi bolti hai

tu samajhdar agar hai to yahi kafi hai

tujhe kahti hai ki kya hai mujhe ji bolti hai