phul mahke chamanistan mein jo KHandan ho kar

phuul mahke chamanistāñ meñ jo ḳhandāñ ho kar

ham bhī sahrā ko chale chāk-e-garebāñ ho kar

ye bhī hai shūmī-e-taqdīr ki rah jaate haiñ

un kī mahfil meñ mire qatl ke sāmāñ ho kar

sham-e-hasrat meñ jalāo na hameñ bahr-e-ḳhudā

aate haiñ bazm meñ ik raat ke mehmāñ ho kar

gaḌ gayā aur nadāmat se pas-e-marg jo vo

aa ke baiThe mirī bālīñ pe pashemāñ ho kar

ham to gesū ko tire sauñp chale haiñ dam-e-naz.a

dekheñ ab rahtī hai kis kī shab-e-hijrāñ ho kar

mere nāloñ kī jo āvāz pahuñch jaatī hai

ghar se bāhar nikal aate haiñ pareshāñ ho kar

pahle jo hālat-e-vahshat pe hañsā karte the

ro rahe haiñ vahī ab chāk-garebāñ ho kar

dil to vo le ga.e pahlī hī nazar meñ 'sayyāf'

kyā mudārāt kareñ be-sar-o-sāmāñ ho kar

phul mahke chamanistan mein jo KHandan ho kar

hum bhi sahra ko chale chaak-e-gareban ho kar

ye bhi hai shumi-e-taqdir ki rah jate hain

un ki mahfil mein mere qatl ke saman ho kar

sham-e-hasrat mein jalao na hamein bahr-e-KHuda

aate hain bazm mein ek raat ke mehman ho kar

gaD gaya aur nadamat se pas-e-marg jo wo

aa ke baiThe meri baalin pe pasheman ho kar

hum to gesu ko tere saunp chale hain dam-e-naza

dekhen ab rahti hai kis ki shab-e-hijran ho kar

mere nalon ki jo aawaz pahunch jati hai

ghar se bahar nikal aate hain pareshan ho kar

pahle jo haalat-e-wahshat pe hansa karte the

ro rahe hain wahi ab chaak-gareban ho kar

dil to wo le gae pahli hi nazar mein 'sayyaf'

kya mudaraat karen be-sar-o-saman ho kar