phul murjha jaenge kanTe lage rah jaenge

phuul murjhā jā.eñge kāñTe lage rah jā.eñge

har ḳhushī miT jā.egī bas dukh hare rah jā.eñge

lāla-zāroñ kohsāroñ meñ tumheñ DhūñDeñge ham

yaad ke be-nām se kuchh silsile rah jā.eñge

tum qarīb ho kar bhī itnī duur hote jaate ho

qurbatoñ ke darmiyāñ bas fāsle rah jā.eñge

tasfiya mābain apne ho na pā.egā kabhī

ham anā kī aag meñ jalte hue rah jā.eñge

azm kī sham.eñ umīdoñ kī har ik qindīl ko

ham bujhā kar zulmat-e-shab meñ khaḌe rah jā.eñge

surma-o-ġhāza ke badle dhuul jamtī jā.egī

sab ke chehre gard-e-qismat se aTe rah jā.eñge

sab chale jā.eñge ik be-nām manzil kī taraf

ghar kī taḳhtī kī jagah katbe lage rah jā.eñge

phul murjha jaenge kanTe lage rah jaenge

har KHushi miT jaegi bas dukh hare rah jaenge

lala-zaron kohsaron mein tumhein DhunDenge hum

yaad ke be-nam se kuchh silsile rah jaenge

tum qarib ho kar bhi itni dur hote jate ho

qurbaton ke darmiyan bas fasle rah jaenge

tasfiya mabain apne ho na paega kabhi

hum ana ki aag mein jalte hue rah jaenge

azm ki shamen umidon ki har ek qindil ko

hum bujha kar zulmat-e-shab mein khaDe rah jaenge

surma-o-ghaza ke badle dhul jamti jaegi

sab ke chehre gard-e-qismat se aTe rah jaenge

sab chale jaenge ek be-nam manzil ki taraf

ghar ki taKHti ki jagah katbe lage rah jaenge