phul patthar ki chaTanon pe khilaen hum bhi

phuul patthar kī chaTānoñ pe khilā.eñ ham bhī

aap kahiye to koī sher sunā.eñ ham bhī

ret par khelte bachchoñ kī nazar se bach kar

aao ik ḳhvāb kī tasvīr banā.eñ ham bhī

ab ke mausam kī havāoñ meñ baḌī vahshat hai

zard pattoñ kī tarah TuuT na jaa.eñ ham bhī

qāfile aur bhī is dasht se guzre hoñge

le ke aa.e haiñ faqīroñ se duā.eñ ham bhī

log jalte hue ghar dekh ke ḳhush hote haiñ

apnā ghar ho to kabhī aag lagā.eñ ham bhī

muntazir hai koī vaadī koī bastī koī dasht

ab pahāḌoñ se pighal kar utar aa.eñ ham bhī

ham se kyā kahte ho fayyāzī-e-dast-e-ḳhairāt

isī kūche meñ lagāte haiñ sadā.eñ ham bhī

phul patthar ki chaTanon pe khilaen hum bhi

aap kahiye to koi sher sunaen hum bhi

ret par khelte bachchon ki nazar se bach kar

aao ek KHwab ki taswir banaen hum bhi

ab ke mausam ki hawaon mein baDi wahshat hai

zard patton ki tarah TuT na jaen hum bhi

qafile aur bhi is dasht se guzre honge

le ke aae hain faqiron se duaen hum bhi

log jalte hue ghar dekh ke KHush hote hain

apna ghar ho to kabhi aag lagaen hum bhi

muntazir hai koi wadi koi basti koi dasht

ab pahaDon se pighal kar utar aaen hum bhi

hum se kya kahte ho fayyazi-e-dast-e-KHairaat

isi kuche mein lagate hain sadaen hum bhi