phul pe jab ek titli dekhi apni jawani yaad aai

phuul pe jab ik titlī dekhī apnī javānī yaad aa.ī

aaj na jaane phir kyuuñ mujh ko apnī kahānī yaad aa.ī

zaḳhm ke Tāñke TuuT ga.e sab raat chalī jo purvā.ī

phir to chale the zaḳhm magar phir terī nishānī yaad aa.ī

yuuñ to sab kuchh bhuul chukā huuñ tark-e-vafā ke ba.ad magar

dard uThā jab dil meñ mere terī nishānī yaad aa.ī

tere kuñvāre jism kī ḳhushbū phail ga.ī hai kamre meñ

tujh ko havā jab chhū kar aa.ī raat suhānī yaad aa.ī

sham.a kī lau par jalte dekhā raat jo ik parvāne ko

saarī kahānī maazī kī vo apnī zabānī yaad aa.ī

bahte hue ik dariyā ko jo dekhā maiñ ne ek 'nazar'

haa.e kisī ke lahje kī vo narm kahānī yaad aa.ī

phul pe jab ek titli dekhi apni jawani yaad aai

aaj na jaane phir kyun mujh ko apni kahani yaad aai

zaKHm ke Tanke TuT gae sab raat chali jo purwai

phir to chale the zaKHm magar phir teri nishani yaad aai

yun to sab kuchh bhul chuka hun tark-e-wafa ke baad magar

dard uTha jab dil mein mere teri nishani yaad aai

tere kunware jism ki KHushbu phail gai hai kamre mein

tujh ko hawa jab chhu kar aai raat suhani yaad aai

shama ki lau par jalte dekha raat jo ek parwane ko

sari kahani mazi ki wo apni zabani yaad aai

bahte hue ek dariya ko jo dekha main ne ek 'nazar'

hae kisi ke lahje ki wo narm kahani yaad aai