phul se meri yahi gham-KHwariyan

phuul se merī yahī ġham-ḳhvāriyāñ

ik gulistāñ meñ hazāroñ kyāriyāñ

baañT kar ham ko ka.ī TukḌe kiye

hai hukūmat kī sabhī tayyāriyāñ

shabnamī qatre nigāhoñ meñ dikhe

ban ga.e haiñ dhuup meñ chingāriyāñ

ye siyāsī log to 'ishrat meñ haiñ

aap ko mujh ko raheñ dushvāriyāñ

dekhnā ab bech na de mulk ko

kauḌiyoñ meñ bech dī ḳhuddāriyāñ

aap maz.hab ko davā kahte rahe

ho ga.ī haiñ ḳhud use bīmāriyāñ

ham nahīñ bole agar tū kaun phir

niiñd toḌegā ki hoñ bedāriyāñ

sab bure haiñ ik bure ko chun liyā

har chunāvoñ meñ yahī lāchāriyāñ

phul se meri yahi gham-KHwariyan

ek gulistan mein hazaron kyariyan

banT kar hum ko kai TukDe kiye

hai hukumat ki sabhi tayyariyan

shabnami qatre nigahon mein dikhe

ban gae hain dhup mein chingariyan

ye siyasi log to 'ishrat mein hain

aap ko mujh ko rahen dushwariyan

dekhna ab bech na de mulk ko

kauDiyon mein bech di KHuddariyan

aap mazhab ko dawa kahte rahe

ho gai hain KHud use bimariyan

hum nahin bole agar tu kaun phir

nind toDega ki hon bedariyan

sab bure hain ek bure ko chun liya

har chunawon mein yahi lachaariyan