phulon ko tabassum ki ada tujhse mili hai

phūloñ ko tabassum kī adā tujh se milī hai

gulshan ko junūñ-ḳhez havā tujh se milī hai

ai ḳhuld-nazar jān-e-chaman rūh-e-bahārāñ

shabnam ko ye namnāk ziyā tujh se milī hai

bazm-e-mah-o-anjum ko bhī ai shāhid-e-rānā

ye nuur se bharpūr fazā tujh se milī hai

gulgūñ lab-o-ruḳhsār ke sadqe meñ shafaq ko

ye rañg kī daulat ba-ḳhudā tujh se milī hai

us rū-e-ziyā-bār pe ye abr kā ghūñgaT

bijlī ko yaqīnan ye hayā tujh se milī hai

saaqī tirī āñkhoñ kī qasam sāġhar-e-mai ko

ye kaifiyat-e-hosh-rubā tujh se milī hai

ai dost terī nīm-nigāhī ke tasadduq

dil ko ḳhalish-e-rūh-fazā tujh se milī hai

kaunain ke har raaz ko mahram jise kahiye

'manshā' ko vahī fikr-e-rasā tujh se milī hai

phulon ko tabassum ki ada tujh se mili hai

gulshan ko junun-KHez hawa tujh se mili hai

ai KHuld-nazar jaan-e-chaman ruh-e-bahaaran

shabnam ko ye namnak ziya tujh se mili hai

bazm-e-mah-o-anjum ko bhi ai shahid-e-rana

ye nur se bharpur faza tujh se mili hai

gulgun lab-o-ruKHsar ke sadqe mein shafaq ko

ye rang ki daulat ba-KHuda tujh se mili hai

us ru-e-ziya-bar pe ye abr ka ghungaT

bijli ko yaqinan ye haya tujh se mili hai

saqi teri aankhon ki qasam saghar-e-mai ko

ye kaifiyat-e-hosh-ruba tujh se mili hai

ai dost teri nim-nigahi ke tasadduq

dil ko KHalish-e-ruh-faza tujh se mili hai

kaunain ke har raaz ko mahram jise kahiye

'mansha' ko wahi fikr-e-rasa tujh se mili hai