phulon se bhare bagh bhi viran nazar aae

phūloñ se bhare baaġh bhī vīrāñ nazar aa.e

shahroñ meñ bahut kam hameñ insāñ nazar aa.e

saiqal na karo aa.ine kyā is kī zarūrat

kirdār to chehroñ pe numāyāñ nazar aa.e

kī hai samar o gul kī ajab parvarish us ne

tā-hadd-e-nazar baaġh bayābāñ nazar aa.e

kapḌe to alag jis ne badan noch liye haiñ

lo naam ki vo shaḳhs bhī uryāñ nazar aa.e

hairat hai ki hāsil jise ārām bahut hai

itnā hī ziyāda vo pareshāñ nazar aa.e

roTī kā aham mas.ala ye hai na mile gar

to haath se jaatā huā īmāñ nazar aa.e

kāfir sahī us se baḌā mohtāt huuñ 'shaukat'

jo aadmī sūrat se musalmāñ nazar aa.e

phulon se bhare bagh bhi viran nazar aae

shahron mein bahut kam hamein insan nazar aae

saiqal na karo aaine kya is ki zarurat

kirdar to chehron pe numayan nazar aae

ki hai samar o gul ki ajab parwarish us ne

ta-hadd-e-nazar bagh bayaban nazar aae

kapDe to alag jis ne badan noch liye hain

lo nam ki wo shaKHs bhi uryan nazar aae

hairat hai ki hasil jise aaram bahut hai

itna hi ziyaada wo pareshan nazar aae

roTi ka aham masala ye hai na mile gar

to hath se jata hua iman nazar aae

kafir sahi us se baDa mohtat hun 'shaukat'

jo aadmi surat se musalman nazar aae