phulon se chhup saka hai kahin gulsitan ka haal

phūloñ se chhup sakā hai kahīñ gulsitāñ kā haal

ham jānte haiñ aaj hai jo is jahāñ kā haal

nazroñ meñ dār-o-gīr kā 'ālam hai aaj bhī

kis dil se ham batā.eñ tumheñ kārvāñ kā haal

bijlī kī zad meñ aa gayā fasl-e-bahār meñ

al-muḳhtasar yahī hai mere āshiyāñ kā haal

naqsha kisī kī bazm kā āñkhoñ meñ phir gayā

vaa.iz ne aaj chheḌā jo bāġh-e-jināñ kā haal

hai fikr gul kī is ko na kaliyoñ kā kuchh ḳhayāl

ham kyā batā.eñ aaj jo hai bāġhbāñ kā haal

be-bāl-o-par paḌā huuñ qafas meñ chaman se duur

kuchh to batāo mujh ko mire gulsitāñ kā haal

mere hī gulsitāñ kī nahīñ baat ai 'umīd'

hai ek hī sā aaj to saare jahāñ kā haal

phulon se chhup saka hai kahin gulsitan ka haal

hum jaante hain aaj hai jo is jahan ka haal

nazron mein dar-o-gir ka 'alam hai aaj bhi

kis dil se hum bataen tumhein karwan ka haal

bijli ki zad mein aa gaya fasl-e-bahaar mein

al-muKHtasar yahi hai mere aashiyan ka haal

naqsha kisi ki bazm ka aankhon mein phir gaya

waiz ne aaj chheDa jo bagh-e-jinan ka haal

hai fikr gul ki is ko na kaliyon ka kuchh KHayal

hum kya bataen aaj jo hai baghban ka haal

be-baal-o-par paDa hun qafas mein chaman se dur

kuchh to batao mujh ko mere gulsitan ka haal

mere hi gulsitan ki nahin baat ai 'umid'

hai ek hi sa aaj to sare jahan ka haal