phulon se saj gai kahin sabza pahan liya

phūloñ se saj ga.ī kahīñ sabza pahan liyā

bārish huī to dhartī ne kyā kyā pahan liyā

jab se paḌhī chatā.ī-nashīnoñ kī zindagī

moTā mahīn jo bhī milā khā pahan liyā

ik jism hai jo roz badaltā hai kuchh libās

ik ruuh hai ki is ne jo pahnā pahan liyā

aisā lagā ki ḳhud bhī baḌā ho gayā huuñ maiñ

jab bhī baḌoñ kā maiñ ne utārā pahan liyā

ḳhud mil gayā hai zehn ko manzil kā har surāġh

qadmoñ ne jab safar kā irāda pahan liyā

maiñ ne bhī aañkh pher lī us kī taraf se aaj

us ne bhī aaj dūsrā chehra pahan liyā

be-iḳhtiyār ho ga.e jab bhī hamāre ashk

ghabrā ke ham ne āñkhoñ pe chashma pahan liyā

phulon se saj gai kahin sabza pahan liya

barish hui to dharti ne kya kya pahan liya

jab se paDhi chatai-nashinon ki zindagi

moTa mahin jo bhi mila kha pahan liya

ek jism hai jo roz badalta hai kuchh libas

ek ruh hai ki is ne jo pahna pahan liya

aisa laga ki KHud bhi baDa ho gaya hun main

jab bhi baDon ka main ne utara pahan liya

KHud mil gaya hai zehn ko manzil ka har suragh

qadmon ne jab safar ka irada pahan liya

main ne bhi aankh pher li us ki taraf se aaj

us ne bhi aaj dusra chehra pahan liya

be-iKHtiyar ho gae jab bhi hamare ashk

ghabra ke hum ne aankhon pe chashma pahan liya