phunki gham-e-firaq ne ye tan-badan mein aag

phūñkī ġham-e-firāq ne ye tan-badan meñ aag

ab jism kī jagah hai mire pairahan meñ aag

angāroñ par liTātī hai furqat meñ sair-e-bāġh

ho merā iḳhtiyār to de duuñ chaman meñ aag

abr-e-siyah nahīñ ye dhuāñ hai bharā huā

kis ne lagā dī aaj sipahr-e-kuhan meñ aag

kushte haiñ tere ruḳh ke jo ai ātishīñ-ezār

le jā.eñge vo bāñdh ke apne kafan meñ aag

ruḳhsat huī bahār ḳhizāñ ke din aa ga.e

ai bāġhbāñ lagā de ab apne chaman meñ aag

sahrā hamārī garmī-e-raftār se jalā

apne hī soz-e-ġham ne lagā dī chaman meñ aag

kis ne kiyā tire lab-e-lālīñ kā tazkira

ahl-e-yaman ne aaj lagā dī yaman meñ aag

zulfoñ se yuuñ ayaañ hai tirā rū-e-ātishīñ

jaise lagī ho vādī-e-chīn-o-ḳhutan meñ aag

'akbar' tirī zabān hai kyā sham.a kī zabān

har fiqra terā sho.ala hai har har suḳhan meñ aag

phunki gham-e-firaq ne ye tan-badan mein aag

ab jism ki jagah hai mere pairahan mein aag

angaron par liTati hai furqat mein sair-e-bagh

ho mera iKHtiyar to de dun chaman mein aag

abr-e-siyah nahin ye dhuan hai bhara hua

kis ne laga di aaj sipahr-e-kuhan mein aag

kushte hain tere ruKH ke jo ai aatishin-ezar

le jaenge wo bandh ke apne kafan mein aag

ruKHsat hui bahaar KHizan ke din aa gae

ai baghban laga de ab apne chaman mein aag

sahra hamari garmi-e-raftar se jala

apne hi soz-e-gham ne laga di chaman mein aag

kis ne kiya tere lab-e-lalin ka tazkira

ahl-e-yaman ne aaj laga di yaman mein aag

zulfon se yun ayan hai tera ru-e-atishin

jaise lagi ho wadi-e-chin-o-KHutan mein aag

'akbar' teri zaban hai kya shama ki zaban

har fiqra tera shoala hai har har suKHan mein aag