pichhle baras ke sanhe bhule na hum abhi

pichhle baras ke sānhe bhūle na ham abhī

tum sāmne na aao ki taaza haiñ ġham abhī

munsif hamāre ahd ke allāh kī panāh

qātil se kah rahe haiñ ki hai mohtaram abhī

uThne lagīñ abhī se mirī samt uñgliyāñ

dahlīz-e-mai-kada pe rakhā hai qadam abhī

koī nahīñ hai merā ġham-e-hijr ke sivā

kyā jaane kis kī yaad meñ palkeñ haiñ nam abhī

kiije jafā.eñ aur ki phūle phale ye fan

soz-o-gudāz tarz-e-bayāñ meñ hai kam abhī

is ko jahāñ meñ aur bhī honā hai pā.edār

urdu zabāñ pe Dhāte hī rahiye sitam abhī

dil meñ ḳhudā hai un ke kaho un se 'sarfarāz'

jo phir rahe haiñ dekhte dair-o-haram abhī

pichhle baras ke sanhe bhule na hum abhi

tum samne na aao ki taza hain gham abhi

munsif hamare ahd ke allah ki panah

qatil se kah rahe hain ki hai mohtaram abhi

uThne lagin abhi se meri samt ungliyan

dahliz-e-mai-kada pe rakha hai qadam abhi

koi nahin hai mera gham-e-hijr ke siwa

kya jaane kis ki yaad mein palken hain nam abhi

kije jafaen aur ki phule phale ye fan

soz-o-gudaz tarz-e-bayan mein hai kam abhi

is ko jahan mein aur bhi hona hai paedar

urdu zaban pe Dhate hi rahiye sitam abhi

dil mein KHuda hai un ke kaho un se 'sarfaraaz'

jo phir rahe hain dekhte dair-o-haram abhi