poshida tha jo sab pe ayan kyun nahin hua

poshīda thā jo sab pe ayaañ kyuuñ nahīñ huā

haq meñ hamāre nek gumāñ kyuuñ nahīñ huā

sarsabz ho ke dil-nashīñ ban jaatī ye zamīñ

aisā gudāz sail-e-ravāñ kyuuñ nahīñ huā

naġhmoñ ke darmiyān fasāna thā pur-kashish

dilkash fazā meñ raqs javāñ kyuuñ nahīñ huā

kal tak galī hamārī daraḳhshāñ na ho sakī

ab to batāo aisā miyāñ kyuuñ nahīñ huā

shān-o-shikoh meñ vo hamesha thā tāza-dam

ghar kī fazā meñ jazb makāñ kyuuñ nahīñ huā

jaltā rahā hamārā zamāna chahār-sū

sho.aloñ ke beach us kā jahāñ kyuuñ nahīñ huā

chehra khulā sā un kī nazar ke qarīb thā

pesh-e-nigāh dard-e-nihāñ kyuuñ nahīñ huā

hairat-zada thī aql hamārī ye soch kar

jo kuchh vahāñ huā thā yahāñ kyuuñ nahīñ huā

hamd-o-sanā duā se sañvārā gayā thā shahr

'ja.afar' magar vo jā-e-amāñ kyuuñ nahīñ huā

poshida tha jo sab pe ayan kyun nahin hua

haq mein hamare nek guman kyun nahin hua

sarsabz ho ke dil-nashin ban jati ye zamin

aisa gudaz sail-e-rawan kyun nahin hua

naghmon ke darmiyan fasana tha pur-kashish

dilkash faza mein raqs jawan kyun nahin hua

kal tak gali hamari daraKHshan na ho saki

ab to batao aisa miyan kyun nahin hua

shan-o-shikoh mein wo hamesha tha taza-dam

ghar ki faza mein jazb makan kyun nahin hua

jalta raha hamara zamana chahaar-su

shoalon ke beach us ka jahan kyun nahin hua

chehra khula sa un ki nazar ke qarib tha

pesh-e-nigah dard-e-nihan kyun nahin hua

hairat-zada thi aql hamari ye soch kar

jo kuchh wahan hua tha yahan kyun nahin hua

hamd-o-sana dua se sanwara gaya tha shahr

'jafar' magar wo ja-e-aman kyun nahin hua