pur-haul hai ye rahguzar dekhte chaliye

pur-haul hai ye rāhguzar dekhte chaliye

kaTtā bhī hai ye kaise safar dekhte chaliye

ye kashmakash-e-shams-o-qamar dekhte chaliye

aahoñ kā zarā apnī asar dekhte chaliye

aalam meñ bahut dhuum nazākat kī machī hai

nāzuk hai bahut un kī kamar dekhte chaliye

hāl-e-dil-e-māshūq aur ham pūchhne jaa.eñ

apnā hī faqat zaḳhm-e-jigar dekhte chaliye

ye husn kā un ke hī taqāzā hai shab-o-roz

jab chaliye idhar se to udhar dekhte chaliye

bedārī-e-shab ho ki ho ik ḳhvāb-e-pashemāñ

ye mo.ajiza-e-shām-o-sahar dekhte chaliye

pur-haul hai ye rahguzar dekhte chaliye

kaTta bhi hai ye kaise safar dekhte chaliye

ye kashmakash-e-shams-o-qamar dekhte chaliye

aahon ka zara apni asar dekhte chaliye

aalam mein bahut dhum nazakat ki machi hai

nazuk hai bahut un ki kamar dekhte chaliye

haal-e-dil-e-mashuq aur hum puchhne jaen

apna hi faqat zaKHm-e-jigar dekhte chaliye

ye husn ka un ke hi taqaza hai shab-o-roz

jab chaliye idhar se to udhar dekhte chaliye

bedari-e-shab ho ki ho ek KHwab-e-pasheman

ye moajiza-e-sham-o-sahar dekhte chaliye