pur-haul KHarabon se shanasai meri hai

pur-haul ḳharāboñ se shanāsā.ī mirī hai

hañgāme agar tere haiñ tanhā.ī mirī hai

ai husn tū har rañg meñ hai qābil-e-izzat

maiñ ishq huuñ har haal meñ rusvā.ī mirī hai

jo sat.h pe hai terī rasā.ī hai usī tak

fankār huuñ maiñ ziist kī gahrā.ī mirī hai

hastī ke ujāle haiñ mirī aañkh kā partav

har chashma-e-pur-nūr meñ bīnā.ī mirī hai

har naqsh-e-hasīñ hai mirī kāvish kā natīja

har manzar-e-dilkash meñ tavānā.ī mirī hai

shā.er huuñ sadāqat kā parastār huuñ 'rūhī'

har rañg meñ har daur kī sachchā.ī mirī hai

pur-haul KHarabon se shanasai meri hai

hangame agar tere hain tanhai meri hai

ai husn tu har rang mein hai qabil-e-izzat

main ishq hun har haal mein ruswai meri hai

jo sath pe hai teri rasai hai usi tak

fankar hun main zist ki gahrai meri hai

hasti ke ujale hain meri aankh ka partaw

har chashma-e-pur-nur mein binai meri hai

har naqsh-e-hasin hai meri kawish ka natija

har manzar-e-dilkash mein tawanai meri hai

shaer hun sadaqat ka parastar hun 'ruhi'

har rang mein har daur ki sachchai meri hai