pur-soz tarannum mein kya shama ghazal-KHwan hai

pur-soz tarannum meñ kyā sham.a ġhazal-ḳhvāñ hai

lau jhūmtī jaatī hai parvāna bhī raqsāñ hai

derīna ḳharāboñ par ta.amīr-e-gulistāñ hai

bā-vasf hujūm-e-gul rañgīnī-e-vīrāñ hai

sho.ala ho ki ḳhushbū ho tāsīr meñ yaksāñ hai

har sham.a mahaktī hai har phuul farozāñ hai

dil ke kisī jazbe ko kyā naam abhī se duuñ

jo un kī nigāhoñ se Takrā.e vo armāñ hai

āsūda zamāne kī be-rāh-ravī tauba

vo mashq-e-sitam jab tak jaarī rahe ehsāñ hai

yaad aatī hai rāhoñ meñ shādābī-e-naḳhlistāñ

phir pā-e-barahna hai pur-ḳhār bayābāñ hai

ḳhāmoshī ke aalam meñ dil Dūbtā jaatā hai

Thahrī huī maujoñ ke dāman meñ bhī tūfāñ hai

ai bazm-e-suḳhan terā aise meñ ḳhudā-hāfiz

palkeñ vo jhukī sī haiñ 'mānī' bhī ġhazal-ḳhvāñ hai

pur-soz tarannum mein kya shama ghazal-KHwan hai

lau jhumti jati hai parwana bhi raqsan hai

derina KHarabon par tamir-e-gulistan hai

ba-wasf hujum-e-gul rangini-e-viran hai

shoala ho ki KHushbu ho tasir mein yaksan hai

har shama mahakti hai har phul farozan hai

dil ke kisi jazbe ko kya nam abhi se dun

jo un ki nigahon se Takrae wo arman hai

aasuda zamane ki be-rah-rawi tauba

wo mashq-e-sitam jab tak jari rahe ehsan hai

yaad aati hai rahon mein shadabi-e-naKHlistan

phir pa-e-barahna hai pur-KHar bayaban hai

KHamoshi ke aalam mein dil Dubta jata hai

Thahri hui maujon ke daman mein bhi tufan hai

ai bazm-e-suKHan tera aise mein KHuda-hafiz

palken wo jhuki si hain 'mani' bhi ghazal-KHwan hai