purani miTTi se paikar naya banaun koi

purānī miTTī se paikar nayā banā.ūñ koī

din aa ga.e haiñ ki ab mo.ajaza dikhā.ūñ koī

pukārte haiñ ufuq ḳhaak be-sifāt huī

zamīn se shajar-e-āftāb ugā.ūñ koī

asā buland karūñ sar-kashīda lahroñ par

fasīl-e-āb uThā.ūñ havā chalā.ūñ koī

siyāhiyoñ meñ chhupe haiñ diloñ ke ā.īne

kahīñ se partav-e-gum-gashta DhūñD lā.ūñ koī

tarāsh luuñ koī jumla lab-e-ḳhamoshī se

charāġh-e-harf sar-e-tāq-e-shab jalā.ūñ koī

ġhubār-e-rañg meñ bhaTkī huī haiñ ḳhushbūeñ

havā kā haath banūñ rāsta dikhā.ūñ koī

zamīñ se lauh-e-falak tak hujūm-e-chashm-o-sadā

bikhar chukā huuñ bahut dā.era lagā.ūñ koī

purani miTTi se paikar naya banaun koi

din aa gae hain ki ab moajaza dikhaun koi

pukarte hain ufuq KHak be-sifat hui

zamin se shajar-e-aftab ugaun koi

asa buland karun sar-kashida lahron par

fasil-e-ab uThaun hawa chalaun koi

siyahiyon mein chhupe hain dilon ke aaine

kahin se partaw-e-gum-gashta DhunD laun koi

tarash lun koi jumla lab-e-KHamoshi se

charagh-e-harf sar-e-taq-e-shab jalaun koi

ghubar-e-rang mein bhaTki hui hain KHushbuen

hawa ka hath banun rasta dikhaun koi

zamin se lauh-e-falak tak hujum-e-chashm-o-sada

bikhar chuka hun bahut daera lagaun koi