puchho mujhe ai ham-nafasan kaun hun kya hun

pūchho mujhe ai ham-nafasāñ kaun huuñ kyā huuñ

yaaro maiñ koī hashr ke maidāñ meñ khaḌā huuñ

tum rañg meñ dekho to huuñ murjhāyā huā phuul

āvāz meñ maiñ TūTte shīshe kī sadā huuñ

merī bhī hikāyat hai vahī dil-zadagī kī

par dard ke unvān meñ mazmūn-e-judā huuñ

kuchh mere hī dam se haiñ bahāroñ ke ma.ānī

maiñ pairav-e-gul gul kī tarah chāk-qabā huuñ

huuñ band ḳhayāloñ meñ ki juuñ phuul meñ ḳhushbū

āzāda-ravī meñ sifat-e-mauj-e-sabā huuñ

ḳhvāhish pe mujhe TuuT ke girnā nahīñ aatā

pyāsā huuñ magar sāhil-e-dariyā pe khaḌā huuñ

shāyad yahī tiryāq bane zahr fanā kā

maiñ talḳhī-e-ayyām kā sat khīñch rahā huuñ

phūloñ kī rifāqat meñ to paa.e haiñ phaphole

kāñToñ se hai ummīd ki maiñ ābla-pā huuñ

din roz-e-qayāmat hai ki kaaTe nahīñ kaTtā

tanhā huuñ ki ḳhud saa.e se bhī apne judā huuñ

raat aa.e to so jā.ūñ añdheroñ se lipaT kar

maiñ sub.h se Dartā huuñ ki sūraj kā Dasā huuñ

katrā ke na chal raah bhaTak jā.egā raahī

maiñ rahrav-e-ummīd kā naqsh-e-kaf-e-pā huuñ

is daur-e-ḳhurāfāt meñ be-qadr huuñ phir bhī

tū jitnā samajhtā hai maiñ kuchh us se sivā huuñ

har rañg har āhañg mire sāmne aajiz

maiñ koh-e-ma.ānī kī bulandī pe khaḌā huuñ

nikleñgī chaTānoñ se mirī fikr kī nahreñ

maiñ lafz ke teshe se unheñ kaaT rahā huuñ

maiñ kīmiyā-gar ḳhud ko jalātā hī rahūñgā

aur tū ye samajhtā hai ki jiine se ḳhafā huuñ

paidā mire naġhmoñ se huiiñ nuur kī lahreñ

maiñ ḳhāliq-e-tahzīb añdheroñ kī ziyā huuñ

'bāqar' mujhe kuchh dād-e-suḳhan kī nahīñ parvā

maiñ shahr-e-ḳhamoshāñ meñ huuñ aur naġhma-sarā huuñ

puchho mujhe ai ham-nafasan kaun hun kya hun

yaro main koi hashr ke maidan mein khaDa hun

tum rang mein dekho to hun murjhaya hua phul

aawaz mein main TuTte shishe ki sada hun

meri bhi hikayat hai wahi dil-zadagi ki

par dard ke unwan mein mazmun-e-juda hun

kuchh mere hi dam se hain bahaaron ke maani

main pairaw-e-gul gul ki tarah chaak-qaba hun

hun band KHayalon mein ki jun phul mein KHushbu

aazada-rawi mein sifat-e-mauj-e-saba hun

KHwahish pe mujhe TuT ke girna nahin aata

pyasa hun magar sahil-e-dariya pe khaDa hun

shayad yahi tiryaq bane zahr fana ka

main talKHi-e-ayyam ka sat khinch raha hun

phulon ki rifaqat mein to pae hain phaphole

kanTon se hai ummid ki main aabla-pa hun

din roz-e-qayamat hai ki kaTe nahin kaTta

tanha hun ki KHud sae se bhi apne juda hun

raat aae to so jaun andheron se lipaT kar

main subh se Darta hun ki suraj ka Dasa hun

katra ke na chal rah bhaTak jaega rahi

main rahraw-e-ummid ka naqsh-e-kaf-e-pa hun

is daur-e-KHurafat mein be-qadr hun phir bhi

tu jitna samajhta hai main kuchh us se siwa hun

har rang har aahang mere samne aajiz

main koh-e-maani ki bulandi pe khaDa hun

niklengi chaTanon se meri fikr ki nahren

main lafz ke teshe se unhen kaT raha hun

main kimiya-gar KHud ko jalata hi rahunga

aur tu ye samajhta hai ki jine se KHafa hun

paida mere naghmon se huin nur ki lahren

main KHaliq-e-tahzib andheron ki ziya hun

'baqar' mujhe kuchh dad-e-suKHan ki nahin parwa

main shahr-e-KHamoshan mein hun aur naghma-sara hun