pyar ka dushman sara zamana kal bhi tha aur aaj bhi hai

pyaar kā dushman saarā zamāna kal bhī thā aur aaj bhī hai

dīvānoñ kā mushkil jiinā kal bhī thā aur aaj bhī hai

duniyā badlī mausam badlā lekin merā yaar nahīñ

us ke dil par merā qabza kal bhī thā aur aaj bhī hai

har mushkil hālat meñ dī hai maiñ ne faqat āvāz tujhe

sab se ziyāda tujh pe bharosa kal bhī thā aur aaj bhī hai

mujh ko kabhī jhulsā na sakī ye tanhā.ī aur ġham kī dhuup

mujh par tere pyaar kā saaya kal bhī thā aur aaj bhī hai

mujh se judā ho jaane vaale tujh ko kahāñ maiñ bhuul sakā

mere dil meñ terā Thikāna kal bhī thā aur aaj bhī hai

pyaar ke dushman duniyā se nāpaid hue kab ke lekin

pyaar ke matvāloñ kā charchā kal bhī thā aur aaj bhī hai

ḳhushiyoñ ke jo phuul khile vo pal-do-pal meñ murjhā.e

merā muqaddar taptā sahrā kal bhī thā aur aaj bhī hai

kaun ye kahtā hai vo mujh ko aur maiñ us ko bhuul gayā

ik duuje se apnā rishta kal bhī thā aur aaj bhī hai

merī ijāzat kī kyā hājat jab jī chāhe aa jaanā

tujh pe khulā dil kā darvāza kal bhī thā aur aaj bhī hai

pyaar ke do matvāloñ ko kar denā barbād aur tabāh

'tābish' ye dastūr-e-zamāna kal bhī thā aur aaj bhī hai

pyar ka dushman sara zamana kal bhi tha aur aaj bhi hai

diwanon ka mushkil jina kal bhi tha aur aaj bhi hai

duniya badli mausam badla lekin mera yar nahin

us ke dil par mera qabza kal bhi tha aur aaj bhi hai

har mushkil haalat mein di hai main ne faqat aawaz tujhe

sab se ziyaada tujh pe bharosa kal bhi tha aur aaj bhi hai

mujh ko kabhi jhulsa na saki ye tanhai aur gham ki dhup

mujh par tere pyar ka saya kal bhi tha aur aaj bhi hai

mujh se juda ho jaane wale tujh ko kahan main bhul saka

mere dil mein tera Thikana kal bhi tha aur aaj bhi hai

pyar ke dushman duniya se napaid hue kab ke lekin

pyar ke matwalon ka charcha kal bhi tha aur aaj bhi hai

KHushiyon ke jo phul khile wo pal-do-pal mein murjhae

mera muqaddar tapta sahra kal bhi tha aur aaj bhi hai

kaun ye kahta hai wo mujh ko aur main us ko bhul gaya

ek duje se apna rishta kal bhi tha aur aaj bhi hai

meri ijazat ki kya hajat jab ji chahe aa jaana

tujh pe khula dil ka darwaza kal bhi tha aur aaj bhi hai

pyar ke do matwalon ko kar dena barbaad aur tabah

'tabish' ye dastur-e-zamana kal bhi tha aur aaj bhi hai