pyar ka karobar karta hun

pyaar kā kārobār kartā huuñ

sab ko duniyā meñ pyaar kartā huuñ

ḳhud pe maiñ e'tibār kartā huuñ

pyaar kartā thā pyaar kartā huuñ

aah be-iḳhtiyār kartā huuñ

yaad jab us kā pyaar kartā huuñ

mujh ko nafrat se saḳht nafrat hai

pyaar ko dil se pyaar kartā huuñ

maut kā intizār kyā ma.anī

zindagānī se pyaar kartā huuñ

sabza-o-ḳhār-o-gul sabhī haiñ aziiz

saare gulshan ko pyaar kartā huuñ

dost kar letā huuñ adū ko bhī

dushmanoñ ko bhī pyaar kartā huuñ

mujh ko kyā ho kisī kā kuchh maslak

maiñ shi.ār apnā pyaar kartā huuñ

mujh ko sañgīñ butoñ se ulfat hai

pattharoñ ko maiñ pyaar kartā huuñ

bach ke chalnā sikhāyā kāñToñ ne

is meñ maiñ un ko pyaar kartā huuñ

umr dukh dard meñ kaTī apnī

is liye ġham se pyaar kartā huuñ

luuT le dil jo aañkh malte hī

aise rahzan ko pyaar kartā huuñ

un ko aatā hai jis qadar ġhussa

utnā hī aur pyaar kartā huuñ

mujh meñ rach bas gayā hai pyaar aisā

sab ko duniyā meñ pyaar kartā huuñ

roz-e-avval se aaj tak 'māhir'

us ko nādīda pyaar kartā huuñ

pyar ka karobar karta hun

sab ko duniya mein pyar karta hun

KHud pe main e'tibar karta hun

pyar karta tha pyar karta hun

aah be-iKHtiyar karta hun

yaad jab us ka pyar karta hun

mujh ko nafrat se saKHt nafrat hai

pyar ko dil se pyar karta hun

maut ka intizar kya mani

zindagani se pyar karta hun

sabza-o-KHar-o-gul sabhi hain aziz

sare gulshan ko pyar karta hun

dost kar leta hun adu ko bhi

dushmanon ko bhi pyar karta hun

mujh ko kya ho kisi ka kuchh maslak

main shiar apna pyar karta hun

mujh ko sangin buton se ulfat hai

pattharon ko main pyar karta hun

bach ke chalna sikhaya kanTon ne

is mein main un ko pyar karta hun

umr dukh dard mein kaTi apni

is liye gham se pyar karta hun

luT le dil jo aankh malte hi

aise rahzan ko pyar karta hun

un ko aata hai jis qadar ghussa

utna hi aur pyar karta hun

mujh mein rach bas gaya hai pyar aisa

sab ko duniya mein pyar karta hun

roz-e-awwal se aaj tak 'mahir'

us ko nadida pyar karta hun