pyar ka qarz adhura hai chukaun kaise

pyaar kā qarz adhūrā hai chukā.ūñ kaise

tujh se va.ada jo kiyā hai vo nibhā.ūñ kaise

mujh ko pardes liye jaatī hai ye fikr-e-ma.āsh

sochtā huuñ ki tujhe chhoḌ ke jā.ūñ kaise

ab to har ek yahāñ apnī hī dhun meñ hai magan

hāl-e-dil apnā kise aur sunā.ūñ kaise

ek tūfān hai nafrat kā mire chāroñ taraf

pyaar ik kāġhazī kashtī hai bachā.ūñ kaise

ab to aañsū bhī nahīñ haiñ mirī in āñkhoñ meñ

dil meñ jo aag lagī hai vo bujhā.ūñ kaise

ik tirā ġham hī uThāyā nahīñ jaatā mujh se

bojh duniyā kā batā tū hī uThā.ūñ kaise

merī ḳhuddārī ijāzat nahīñ detī 'sāġhar'

sar dar-e-ġhair pe apnā maiñ jhukā.ūñ kaise

pyar ka qarz adhura hai chukaun kaise

tujh se wada jo kiya hai wo nibhaun kaise

mujh ko pardes liye jati hai ye fikr-e-maash

sochta hun ki tujhe chhoD ke jaun kaise

ab to har ek yahan apni hi dhun mein hai magan

haal-e-dil apna kise aur sunaun kaise

ek tufan hai nafrat ka mere chaaron taraf

pyar ek kaghazi kashti hai bachaun kaise

ab to aansu bhi nahin hain meri in aankhon mein

dil mein jo aag lagi hai wo bujhaun kaise

ek tera gham hi uThaya nahin jata mujh se

bojh duniya ka bata tu hi uThaun kaise

meri KHuddari ijazat nahin deti 'saghar'

sar dar-e-ghair pe apna main jhukaun kaise