pyar mein shart kisi tarh ki manzur nahin

pyaar meñ shart kisī tarh kī manzūr nahīñ

ham agar duur nahīñ tum bhī to majbūr nahīñ

vaqt aane do bahut log mileñge tum ko

kyā samajhte ho ki ab 'sarmad'-o-'mansūr' nahīñ

māntā huuñ ki adā.eñ haiñ tirī tauba-shikan

jo bhī hai phir bhī tū jannat kī koī huur nahīñ

chal paḌo to nahīñ is baat kā hogā ehsās

duur hai manzil-e-maqsūd magar duur nahīñ

vo jo chāhe to har ik chiiz ko hāsil kar le

‘mīr-sajjād' jise kahte haiñ mā'zūr nahīñ

pyar mein shart kisi tarh ki manzur nahin

hum agar dur nahin tum bhi to majbur nahin

waqt aane do bahut log milenge tum ko

kya samajhte ho ki ab 'sarmad'-o-'mansur' nahin

manta hun ki adaen hain teri tauba-shikan

jo bhi hai phir bhi tu jannat ki koi hur nahin

chal paDo to nahin is baat ka hoga ehsas

dur hai manzil-e-maqsud magar dur nahin

wo jo chahe to har ek chiz ko hasil kar le

‘mir-sajjad' jise kahte hain ma'zur nahin