qabu mein dil ho to kahen shaida na kijiye

qaabū meñ dil ho to kaheñ shaidā na kījiye

apne ko apne haath se rusvā na kījiye

dil le ke bosa dete nahīñ aur ye kahte haiñ

apne parā.e meñ kahīñ charchā na kījiye

rindān bāda-ḳhvār meñ hai aib-e-sar-kashī

ḳham kis tarah se gardan-e-mīnā na kījiye

iisā se un kī chashm-e-suḳhan go ye kahtī hai

mere marīz-e-ishq ko achchhā na kījiye

muñh pheriye na lāl-e-shakar khā ke bose se

dil apne talḳh-kām kā khaTTā na kījiye

ḳhūñ-reziyāñ Tapaktī haiñ pā-e-hinā.ī se

fitna ḳhirām-e-nāz kā barpā na kījiye

āġhāz ishq ko diyā anjām-e-girya ne

ab kyā 'vaqār' kījiye aur kyā na kījiye

qabu mein dil ho to kahen shaida na kijiye

apne ko apne hath se ruswa na kijiye

dil le ke bosa dete nahin aur ye kahte hain

apne parae mein kahin charcha na kijiye

rindan baada-KHwar mein hai aib-e-sar-kashi

KHam kis tarah se gardan-e-mina na kijiye

isa se un ki chashm-e-suKHan go ye kahti hai

mere mariz-e-ishq ko achchha na kijiye

munh pheriye na lal-e-shakar kha ke bose se

dil apne talKH-kaam ka khaTTa na kijiye

KHun-reziyan Tapakti hain pa-e-hinai se

fitna KHiram-e-naz ka barpa na kijiye

aaghaz ishq ko diya anjam-e-girya ne

ab kya 'waqar' kijiye aur kya na kijiye