qaem kahan kisi ka sada rah saka sitam

qaa.em kahāñ kisī kā sadā rah sakā sitam

hai chand roza bas ye sitamgar tirā sitam

kab tak tū zulm Dhā.egā kab tak satā.egā

zālim samajh ke soch ke tū ham pe Dhā sitam

tere ye taḳht-o-tāj na kuchh kaam ā.eñge

himmat se merī jab tirā Takrā.egā sitam

zālim vo ek roz zamāne se miT gayā

mazlūmoñ par jo Dhātā rahā thā baḌā sitam

munsif hai terā terī adālat ġhulām hai

rokegā tujh ko kaun tū jī bhar ke Dhā sitam

ham par nahīñ kisī kī nazar aaj mehrbāñ

jis ko bhī dekho ham pe vo hī kar rahā sitam

khole jo maiñ ne hoñT 'qamar' sī diye ga.e

haq bolne se lagtā hai ḳhud par kiyā sitam

qaem kahan kisi ka sada rah saka sitam

hai chand roza bas ye sitamgar tera sitam

kab tak tu zulm Dhaega kab tak sataega

zalim samajh ke soch ke tu hum pe Dha sitam

tere ye taKHt-o-taj na kuchh kaam aaenge

himmat se meri jab tera Takraega sitam

zalim wo ek roz zamane se miT gaya

mazlumon par jo Dhata raha tha baDa sitam

munsif hai tera teri adalat ghulam hai

rokega tujh ko kaun tu ji bhar ke Dha sitam

hum par nahin kisi ki nazar aaj mehrban

jis ko bhi dekho hum pe wo hi kar raha sitam

khole jo main ne honT 'qamar' si diye gae

haq bolne se lagta hai KHud par kiya sitam