qamat-e-dil-ruba par shabab aa gaya

qāmat-e-dil-rubā par shabāb aa gayā

yā savā neze par āftāb aa gayā

jaagī jaagī un āñkhoñ kā aalam na pūchh

sāmne ek jām-e-sharāb aa gayā

ik nigāh-e-mohabbat kī taḳhmīr meñ

sab simaT kar jahān-e-ḳharāb aa gayā

ye chale vo baḌhe vo javāñ ho ga.e

chand lamhoñ meñ yaum-ul-hisāb aa gayā

jhuum uThī ek armāñ-bharī zindagī

jab havā.eñ chalīñ jab sahāb aa gayā

aa.iye aa.iye is taraf vo 'nushūr'

shā.er-e-yādgār-e-shabāb aa gayā

qamat-e-dil-ruba par shabab aa gaya

ya sawa neze par aaftab aa gaya

jagi jagi un aankhon ka aalam na puchh

samne ek jam-e-sharab aa gaya

ek nigah-e-mohabbat ki taKHmir mein

sab simaT kar jahan-e-KHarab aa gaya

ye chale wo baDhe wo jawan ho gae

chand lamhon mein yaum-ul-hisab aa gaya

jhum uThi ek arman-bhari zindagi

jab hawaen chalin jab sahab aa gaya

aaiye aaiye is taraf wo 'nushur'

shaer-e-yaadgar-e-shabab aa gaya