qatil hua KHamosh to talwar bol uThi

qātil huā ḳhamosh to talvār bol uThī

maqtal meñ ḳhūn-e-garm kī har dhaar bol uThī

pūchhā subuk saroñ kā numā.inda kaun hai

sun kar faqīh-e-shahr kī dastār bol uThī

ahl-e-sitam ke ḳhauf se jo chup thī vo zabāñ

jab bolne pe aa.ī sar-e-dār bol uThī

merī tabāhiyoñ kī hai is meñ ḳhabar zarūr

az ḳhud har ek surḳhi-e-aḳhbār bol uThī

chehra thā zaḳhm zaḳhm koī pūchhtā na thā

yūsuf bane to garmī-e-bāzār bol uThī

ik nāḳhudā hī yūrish-e-tūfāñ pe chup rahā

chappū kabhī to aur kabhī patvār bol uThī

kuchh is tarah se naqsh the īñToñ pe sāñche ke

zindāñ meñ mujh ko dekh ke dīvār bol uThī

qatil hua KHamosh to talwar bol uThi

maqtal mein KHun-e-garm ki har dhaar bol uThi

puchha subuk saron ka numainda kaun hai

sun kar faqih-e-shahr ki dastar bol uThi

ahl-e-sitam ke KHauf se jo chup thi wo zaban

jab bolne pe aai sar-e-dar bol uThi

meri tabahiyon ki hai is mein KHabar zarur

az KHud har ek surKHi-e-aKHbar bol uThi

chehra tha zaKHm zaKHm koi puchhta na tha

yusuf bane to garmi-e-bazar bol uThi

ek naKHuda hi yurish-e-tufan pe chup raha

chappu kabhi to aur kabhi patwar bol uThi

kuchh is tarah se naqsh the inTon pe sanche ke

zindan mein mujh ko dekh ke diwar bol uThi