qatil ke kuche mein hama-tan jaun ban ke panw

qātil ke kūche meñ hama-tan jā.ūñ ban ke paañv

mar kar hī taaki so to zarā pā.ūñ tan ke paaoñ

kyūñkar rakhūñ maiñ sair ko andar chaman ke paañv

ik umr se to ho rahe ḳhūgar haiñ ban ke paañv

bhārī haiñ nāzukī se jo mehñdī meñ san ke paañv

kahte haiñ kar diye mire kyuuñ laakh man ke paañv

kyā saath merā dasht-navardī meñ kar sake

do-chār chaukḌī meñ ga.e thak hiran ke paañv

hāthoñ ko hai havā se garebāñ-darī hanūz

sahrā-talab haiñ mar ke bhī andar kafan ke paañv

aanā hai der der to jaanā hai jald jald

raftan ke aur haiñ tire aur āmdan ke paañv

sadme se haath ke kahīñ gaTTā utar na jaa.e

kyūñkar dabā.ūñ us but-e-nāzuk-badan ke paañv

ai dil tū dekh us kī sar-e-zulf meñ na jā

nādāñ hai sar pe jo rakhe kaale ke phan ke paañv

kuchh aaj ye bhī aatā hai rindo piye hue

paḌte haiñ bahke bahke jo sheḳh-e-zaman ke paañv

pahuñchā hai ab to 'sehr' kalām apnā duur duur

shohrat se lag ga.e haiñ hamāre suḳhan ke paañv

qatil ke kuche mein hama-tan jaun ban ke panw

mar kar hi taki so to zara paun tan ke paon

kyunkar rakhun main sair ko andar chaman ke panw

ek umr se to ho rahe KHugar hain ban ke panw

bhaari hain nazuki se jo mehndi mein san ke panw

kahte hain kar diye mere kyun lakh man ke panw

kya sath mera dasht-nawardi mein kar sake

do-chaar chaukDi mein gae thak hiran ke panw

hathon ko hai hawa se gareban-dari hanuz

sahra-talab hain mar ke bhi andar kafan ke panw

aana hai der der to jaana hai jald jald

raftan ke aur hain tere aur aamdan ke panw

sadme se hath ke kahin gaTTa utar na jae

kyunkar dabaun us but-e-nazuk-badan ke panw

ai dil tu dekh us ki sar-e-zulf mein na ja

nadan hai sar pe jo rakhe kale ke phan ke panw

kuchh aaj ye bhi aata hai rindo piye hue

paDte hain bahke bahke jo sheKH-e-zaman ke panw

pahuncha hai ab to 'sehr' kalam apna dur dur

shohrat se lag gae hain hamare suKHan ke panw