qatil ko tegh-e-naz pe hai naz dekhna

qātil ko teġh-e-nāz pe hai naaz dekhnā

dāman uThā ke chalne kā andāz dekhnā

rashk-e-raqīb kā to gumāñ bhī na kījiye

martā huuñ is liye ki hai e.ajāz dekhnā

tum aur apne va.ade pe aa jaao shaam se

kyā baat ban paḌī hai ḳhudā-sāz dekhnā

hai ḳhūn-e-dil abhī sar-e-mizhgāñ jamā huā

un kī taraf na dīda-e-ġhammāz dekhnā

fasl-e-bahār aate hī mutrib banī sabā

chheḌā shamīm-e-gul ne nayā saaz dekhnā

ā.īna sāmne na sahī aarsī to hai

tum apne muskurāne kā andāz dekhnā

baazū haiñ vā qafas meñ taḌaptā huuñ rāt-din

kis se kahūñ ki hasrat-e-parvāz dekhnā

yuuñ dekhne ke vāste lākhoñ hasīn haiñ

kis ko huā nasīb ye andāz dekhnā

ġhussa meñ aañkh bhī nahīñ miltī kisī se aaj

kis par gire nigāh kā shahbāz dekhnā

har lab pe gudgudī kā asar dekhtā huuñ maiñ

mahfil meñ un kī shoḳhī-e-āvāz dekhnā

qaa.il banī nazākat-e-āvāz dekhnā

likhe haiñ sher hazrat-e-'beḳhud' ke rañg meñ

ai ahl-e-bazm 'shād' kā e.ajāz dekhnā

qatil ko tegh-e-naz pe hai naz dekhna

daman uTha ke chalne ka andaz dekhna

rashk-e-raqib ka to guman bhi na kijiye

marta hun is liye ki hai eajaz dekhna

tum aur apne wade pe aa jao sham se

kya baat ban paDi hai KHuda-saz dekhna

hai KHun-e-dil abhi sar-e-mizhgan jama hua

un ki taraf na dida-e-ghammaz dekhna

fasl-e-bahaar aate hi mutrib bani saba

chheDa shamim-e-gul ne naya saz dekhna

aaina samne na sahi aarsi to hai

tum apne muskurane ka andaz dekhna

bazu hain wa qafas mein taDapta hun raat-din

kis se kahun ki hasrat-e-parwaz dekhna

yun dekhne ke waste lakhon hasin hain

kis ko hua nasib ye andaz dekhna

ghussa mein aankh bhi nahin milti kisi se aaj

kis par gire nigah ka shahbaz dekhna

har lab pe gudgudi ka asar dekhta hun main

mahfil mein un ki shoKHi-e-awaz dekhna

qail bani nazakat-e-awaz dekhna

likhe hain sher hazrat-e-'beKHud' ke rang mein

ai ahl-e-bazm 'shad' ka eajaz dekhna