qatilo mangen to saughat-e-safar de dena

qātilo māñgeñ to sauġhāt-e-safar de denā

mere bachchoñ ko mirā kāsa-e-sar de denā

log pūchheñge ki pardes se kyā laa.e ho

rāsto ham ko zarā gard-e-safar de denā

sarhadeñ jis kī mileñ daar se zindānoñ se

zindagī mujh ko vahī rāhguzar de denā

ahl-e-lashkar jo kamīñ-gāhoñ meñ vāpas jaanā

mere hāthoñ meñ bhī bosīda sipar de denā

ghar se masmūm havāoñ ko guzarne ke liye

koī rauzan koī khiḌkī koī dar de denā

koī kahtā hai ye maqtal kī zamīñ se jā kar

āsmānoñ ko mire shams-o-qamar de denā

ab jo ghabrā ke añdhere se ye duniyā 'kāzim'

raushnī māñge to tābūt-e-sahar de denā

qatilo mangen to saughat-e-safar de dena

mere bachchon ko mera kasa-e-sar de dena

log puchhenge ki pardes se kya lae ho

rasto hum ko zara gard-e-safar de dena

sarhaden jis ki milen dar se zindanon se

zindagi mujh ko wahi rahguzar de dena

ahl-e-lashkar jo kamin-gahon mein wapas jaana

mere hathon mein bhi bosida sipar de dena

ghar se masmum hawaon ko guzarne ke liye

koi rauzan koi khiDki koi dar de dena

koi kahta hai ye maqtal ki zamin se ja kar

aasmanon ko mere shams-o-qamar de dena

ab jo ghabra ke andhere se ye duniya 'kazim'

raushni mange to tabut-e-sahar de dena