qabza mere badan pe meri KHwahishon ka hai

qabza mire badan pe mirī ḳhvāhishoñ kā hai

bastī mirī pe raaj mire dushmanoñ kā hai

qalb-o-nazar meñ nuur na.e tajraboñ kā hai

ehsān kis qadar ye badaltī rutoñ kā hai

chehre se dhul chukī mirī bedāriyoñ kī raakh

āñkhoñ meñ kuchh ḳhumār abhī ratjagoñ kā hai

tū so rahā thā aur maiñ dastak na de sakā

kitnā ḳhayāl mujh ko tirī rāhatoñ kā hai

shāyad vo aaj merī tarah hī thā be-qarār

yā ye bhī koī aks mirī uljhanoñ kā hai

chaltī hai jis tarah se tirī nabz tez tez

andāz hū-ba-hū ye mirī dhaḌkanoñ kā hai

jin ke tufail sabz hai kohsār kā badan

sailāb vādiyoñ meñ unheñ bārishoñ kā hai

dīvāngī meñ merī nahīñ hai kisī kā haath

saarā qusūr us meñ mirī ādatoñ kā hai

dil muztarib hai aur siyāhat hai be-maza

jaadū abhī hamāre saroñ par gharoñ kā hai

kyā jāneñ kis tarah se use tai kareñge ham

darpesh ik safar jo ghane jañgaloñ kā hai

'betāb' apne haal pe mātam na kyuuñ karūñ

mujh ko abhī to rañj luTī sā.atoñ kā hai

qabza mere badan pe meri KHwahishon ka hai

basti meri pe raj mere dushmanon ka hai

qalb-o-nazar mein nur nae tajrabon ka hai

ehsan kis qadar ye badalti ruton ka hai

chehre se dhul chuki meri bedariyon ki rakh

aankhon mein kuchh KHumar abhi ratjagon ka hai

tu so raha tha aur main dastak na de saka

kitna KHayal mujh ko teri rahaton ka hai

shayad wo aaj meri tarah hi tha be-qarar

ya ye bhi koi aks meri uljhanon ka hai

chalti hai jis tarah se teri nabz tez tez

andaz hu-ba-hu ye meri dhaDkanon ka hai

jin ke tufail sabz hai kohsar ka badan

sailab wadiyon mein unhen barishon ka hai

diwangi mein meri nahin hai kisi ka hath

sara qusur us mein meri aadaton ka hai

dil muztarib hai aur siyahat hai be-maza

jadu abhi hamare saron par gharon ka hai

kya jaanen kis tarah se use tai karenge hum

darpesh ek safar jo ghane jangalon ka hai

'betab' apne haal pe matam na kyun karun

mujh ko abhi to ranj luTi saaton ka hai