qad ke lihaz se to sabhi aasman the

qad ke lihāz se to sabhī āsmān the

ham jaise bā-kamāl magar be-nishān the

jiite na the guzārte rahte the roz-o-shab

sāñseñ na thiiñ qadam-ba-qadam imtihān the

tanhā nihatte laḌte rahe zindagī kī jañg

lashkar thā saath aur na tīr-o-kamān the

ai ajnabī na pūchh udāsī kā mājrā

vo log kho ga.e haiñ jo bastī kī jaan the

rishtoñ kī ūñch-nīch se vāqif na thā 'hanīf'

mere aziiz mujh se bahut bad-gumān the

qad ke lihaz se to sabhi aasman the

hum jaise ba-kamal magar be-nishan the

jite na the guzarte rahte the roz-o-shab

sansen na thin qadam-ba-qadam imtihan the

tanha nihatte laDte rahe zindagi ki jang

lashkar tha sath aur na tir-o-kaman the

ai ajnabi na puchh udasi ka majra

wo log kho gae hain jo basti ki jaan the

rishton ki unch-nich se waqif na tha 'hanif'

mere aziz mujh se bahut bad-guman the