qadam-e-KHush-badanan shoabda-gar hai ki nahin

qadam-e-ḳhush-badanāñ sho.abda-gar hai ki nahīñ

ye zamīñ-lāla-ruḳh-o-kisht-e-guhar hai ki nahīñ

dekhiye rañg-e-hinā rū-e-shafaq josh-e-bahār

tā.ir-e-ḳhvāb to hai tāb-e-safar hai ki nahīñ

be-sabab maiñ nahīñ tāsīr-e-nazar kā qaa.il

zaḳhm ġhuncha-sifat-o-shāḳh-e-samar hai ki nahīñ

terī āvāz kalīd-e-chamanastīñ hai magar

sīna-e-nai meñ gudāz-e-gul-e-tar hai ki nahīñ

dekhne jā.ūñ qad-o-āriz-o-gesū-e-sanam

sochtā huuñ ki koī rāh-o-mafar hai ki nahīñ

sar paTaktī huī ik mauj ne dariyā se kahā

āb-e-āsūda-e-dariyā mirā ghar hai ki nahīñ

zor-e-amvāj-e-talātum se hai dariyā dariyā

harf-e-be-sūd ki dariyā meñ guhar hai ki nahīñ

qadam-e-KHush-badanan shoabda-gar hai ki nahin

ye zamin-lala-ruKH-o-kisht-e-guhar hai ki nahin

dekhiye rang-e-hina ru-e-shafaq josh-e-bahaar

tair-e-KHwab to hai tab-e-safar hai ki nahin

be-sabab main nahin tasir-e-nazar ka qail

zaKHm ghuncha-sifat-o-shaKH-e-samar hai ki nahin

teri aawaz kalid-e-chamanastin hai magar

sina-e-nai mein gudaz-e-gul-e-tar hai ki nahin

dekhne jaun qad-o-ariz-o-gesu-e-sanam

sochta hun ki koi rah-o-mafar hai ki nahin

sar paTakti hui ek mauj ne dariya se kaha

aab-e-asuda-e-dariya mera ghar hai ki nahin

zor-e-amwaj-e-talatum se hai dariya dariya

harf-e-be-sud ki dariya mein guhar hai ki nahin