qadam qadam pe fareb-e-sabaat rakh dena

qadam qadam pe fareb-e-sabāt rakh denā

bashar ke naam pe kul kā.enāt rakh denā

havā-e-dard kī zad par hayāt rakh denā

nihāl-e-zaḳhm harā shash jihāt rakh denā

lapeTnā mujhe anfās ke salāsil meñ

aur us ke ba.ad ka.ī hādsāt rakh denā

magar ye kyā ki chhurī par aziyyat-e-shab kī

kisī kī ho ki na ho merī zaat rakh denā

na niiñd āñkhoñ meñ aa.e na ḳhvāb hī aa.e

jo din Dhale to phir aisī hī raat rakh denā

na buuñd buuñd ko tarsūñ ki karbalā meñ huuñ

nazar ke sāmne lekin furāt rakh denā

yahī hai lazzat-e-guftār baat meñ apnī

koī ḳhilāf-e-tabī.at bhī baat rakh denā

qadam qadam pe fareb-e-sabaat rakh dena

bashar ke nam pe kul kaenat rakh dena

hawa-e-dard ki zad par hayat rakh dena

nihaal-e-zaKHm hara shash jihat rakh dena

lapeTna mujhe anfas ke salasil mein

aur us ke baad kai hadsat rakh dena

magar ye kya ki chhuri par aziyyat-e-shab ki

kisi ki ho ki na ho meri zat rakh dena

na nind aankhon mein aae na KHwab hi aae

jo din Dhale to phir aisi hi raat rakh dena

na bund bund ko tarsun ki karbala mein hun

nazar ke samne lekin furaat rakh dena

yahi hai lazzat-e-guftar baat mein apni

koi KHilaf-e-tabiat bhi baat rakh dena