qadam qadam pe gire uTThe bar bar chale

qadam qadam pe gire uTThe baar baar chale

tamām umr isī taur ham guzār chale

zamāna guzrā ki dil nazr-e-hādsāt huā

ab ek jaañ thī use zindagī pe vaar chale

fuzūñ kuchh aur huā bandishoñ se josh-e-junūñ

rihā hue jo qafas se to sū-e-dār chale

adā-e-laġhzish-e-rindān-e-bāda-mast kahāñ

machal machal ke nasīm-e-chaman hazār chale

rukūñ to gardish-e-shām-o-sahar Thahar jaa.e

chalūñ to saath har ik naqsh-e-rahguzār chale

jale charāġh khile gul ubal paḌe naġhme

jahāñ jahāñ tire dhoke meñ ham pukār chale

huā to ḳhūn-e-dil-o-jān-o-ārzū 'at.har'

mazāq-e-ahl-e-mohabbat magar sañvār chale

qadam qadam pe gire uTThe bar bar chale

tamam umr isi taur hum guzar chale

zamana guzra ki dil nazr-e-hadsat hua

ab ek jaan thi use zindagi pe war chale

fuzun kuchh aur hua bandishon se josh-e-junun

riha hue jo qafas se to su-e-dar chale

ada-e-laghzish-e-rindan-e-baada-mast kahan

machal machal ke nasim-e-chaman hazar chale

rukun to gardish-e-sham-o-sahar Thahar jae

chalun to sath har ek naqsh-e-rahguzar chale

jale charagh khile gul ubal paDe naghme

jahan jahan tere dhoke mein hum pukar chale

hua to KHun-e-dil-o-jaan-o-arzu 'athar'

mazaq-e-ahl-e-mohabbat magar sanwar chale