qadam sambhal ke baDhao ki raushni kam hai

qadam sambhal ke baḌhāo ki raushnī kam hai

agar ye bhuul na jaao ki raushnī kam hai

gharoñ ko aag lagāo ki raushnī kam hai

yahīñ se baat banāo ki raushnī kam hai

javāb ye ki koī rahnumā-e-qaum haiñ aap

agar kisī ko batāo ki raushnī kam hai

sahar ko shaam samajhnā jo bas kī baat nahīñ

yahī savāl uThāo ki raushnī kam hai

sharīk-e-bazm-e-siyāsat haiñ kuchh bure chehre

zarā qarīb to aao ki raushnī kam hai

sadā lagāo ki āñkheñ ajiib ne.amat haiñ

unheñ yaqīn dilāo ki raushnī kam hai

kahīñ jhapaT na paḌeñ din meñ mash.aleñ le kar

avaam ko na sujhāo ki raushnī kam hai

ravā nahīñ ki kisī Dūbte sitāre ko

charāġh-e-rāh banāo ki raushnī kam hai

savād-e-shām ke ḳhāmosh jugnuoñ se kaho

tumhīñ charāġh jalāo ki raushnī kam hai

zarā pahuñch ke to dekho savād-e-manzil tak

tum is ḳhabar pe na jaao ki raushnī kam hai

hazār saal to rahtā nahīñ ubūrī daur

fasād ḳhuub ugaao ki raushnī kam hai

ye shā.erān-e-ġhalat-bīñ kaheñge ik din 'shād'

hameñ charāġh dikhāo ki raushnī kam hai

qadam sambhal ke baDhao ki raushni kam hai

agar ye bhul na jao ki raushni kam hai

gharon ko aag lagao ki raushni kam hai

yahin se baat banao ki raushni kam hai

jawab ye ki koi rahnuma-e-qaum hain aap

agar kisi ko batao ki raushni kam hai

sahar ko sham samajhna jo bas ki baat nahin

yahi sawal uThao ki raushni kam hai

sharik-e-bazm-e-siyasat hain kuchh bure chehre

zara qarib to aao ki raushni kam hai

sada lagao ki aankhen ajib neamat hain

unhen yaqin dilao ki raushni kam hai

kahin jhapaT na paDen din mein mashalen le kar

awam ko na sujhao ki raushni kam hai

rawa nahin ki kisi Dubte sitare ko

charagh-e-rah banao ki raushni kam hai

sawad-e-sham ke KHamosh jugnuon se kaho

tumhin charagh jalao ki raushni kam hai

zara pahunch ke to dekho sawad-e-manzil tak

tum is KHabar pe na jao ki raushni kam hai

hazar sal to rahta nahin uburi daur

fasad KHub ugao ki raushni kam hai

ye shaeran-e-ghalat-bin kahenge ek din 'shad'

hamein charagh dikhao ki raushni kam hai