qadam uThate hi chakra ke gir paDen hum bhi

qadam uThāte hī chakrā ke gir paḌeñ ham bhī

tumhārī tarah sañbhal ke agar chaleñ ham bhī

pasīne poñchh rahī hai havā daraḳhtoñ ke

thakan kī gard kahīñ ruk ke jhaaḌ leñ ham bhī

vo likh rahe haiñ añdhere meñ kuchh hathelī par

ujālā ho to zarā ġhaur se paḌheñ ham bhī

badal ke bhes harīfoñ kī fauj niklī hai

kisī tarah kā koī ruup dhaar leñ ham bhī

Thahar ga.ī hai kaḌī dhuup ek markaz par

dabīz chhāñv mile to kahīñ rukeñ ham bhī

fasīl-e-lab pe juḌe haiñ sukūt ke shīshe

zabāñ ko zaḳhm lagā.eñ to kuchh kaheñ ham bhī

qadam uThate hi chakra ke gir paDen hum bhi

tumhaari tarah sanbhal ke agar chalen hum bhi

pasine ponchh rahi hai hawa daraKHton ke

thakan ki gard kahin ruk ke jhaD len hum bhi

wo likh rahe hain andhere mein kuchh hatheli par

ujala ho to zara ghaur se paDhen hum bhi

badal ke bhes harifon ki fauj nikli hai

kisi tarah ka koi rup dhaar len hum bhi

Thahar gai hai kaDi dhup ek markaz par

dabiz chhanw mile to kahin ruken hum bhi

fasil-e-lab pe juDe hain sukut ke shishe

zaban ko zaKHm lagaen to kuchh kahen hum bhi