qadmon mein bhi takan thi ghar bhi qarib tha

qadmoñ meñ bhī takān thī ghar bhī qarīb thā

par kyā kareñ ki ab ke safar hī ajiib thā

nikle agar to chāñd darīche meñ ruk bhī jaa.e

is shahr-e-be-charāġh meñ kis kā nasīb thā

āñdhī ne un rutoñ ko bhī be-kār kar diyā

jin kā kabhī humā sā parinda nasīb thā

kuchh apne-āp se hī use kashmakash na thī

mujh meñ bhī koī shaḳhs usī kā raqīb thā

pūchhā kisī ne mol to hairān rah gayā

apnī nigāh meñ koī kitnā ġharīb thā

maqtal se aane vaalī havā ko bhī kab milā

aisā koī darīcha ki jo be-salīb thā

qadmon mein bhi takan thi ghar bhi qarib tha

par kya karen ki ab ke safar hi ajib tha

nikle agar to chand dariche mein ruk bhi jae

is shahr-e-be-charagh mein kis ka nasib tha

aandhi ne un ruton ko bhi be-kar kar diya

jin ka kabhi huma sa parinda nasib tha

kuchh apne-ap se hi use kashmakash na thi

mujh mein bhi koi shaKHs usi ka raqib tha

puchha kisi ne mol to hairan rah gaya

apni nigah mein koi kitna gharib tha

maqtal se aane wali hawa ko bhi kab mila

aisa koi daricha ki jo be-salib tha