qadr-dan koi na asfal hai na aala apna

qadr-dāñ koī na asfal hai na a.alā apnā

na zamīn par na falak par hai Thikānā apnā

dast-e-shafqat se diyā aap ne chhallā apnā

haath bhar baḌh gayā siine meñ kaleja apnā

aa.e mastī ke din ayyām-e-bahārī aa.e

sher kī tarah lagā gūñjne sahrā apnā

na bharā jaam na saaqī ne kabhī yaad kiyā

tāq-e-nisyāñ pe dharā rahtā hai miinā apnā

dekhte bhī vo nahīñ aañkh uThā kar ham ko

saad hotā nahīñ sarkār meñ chehrā apnā

kis ke hāthoñ hadaf-e-tīr-e-balā ham na hue

dil hai mānind-e-kamāñ sab se kashīda apnā

dil-jale dūd-e-pareshāñ kī tarah haiñ barbād

ham kahīñ Thahreñ to batlā.eñ Thikānā apnā

kaun mushtāq hai ham daaġh dikhā.eñ kis ko

dekheñ ḳhud sūrat-e-tā.ūs tamāshā apnā

sharm bande kī tire haath hai ai rabb-e-karīm

na khule ḳhaak ke parde meñ bhī pardā apnā

ham ko jo rañj pahuñchte haiñ vo kis se kahiye

ham ko mehmān samajhtī nahīñ duniyā apnā

zindagī chāhiye jañgal meñ bhī kuchh ḳhauf nahīñ

ai junūñ sher kā āḳhir kabhī ghar thā apnā

turfa ḳhushkī-o-tarī kī hai hameñ sair ai 'bahr'

dasht hai apnā ġhubār ashk hai dariyā apnā

qadr-dan koi na asfal hai na aala apna

na zamin par na falak par hai Thikana apna

dast-e-shafqat se diya aap ne chhalla apna

hath bhar baDh gaya sine mein kaleja apna

aae masti ke din ayyam-e-bahaari aae

sher ki tarah laga gunjne sahra apna

na bhara jam na saqi ne kabhi yaad kiya

taq-e-nisyan pe dhara rahta hai mina apna

dekhte bhi wo nahin aankh uTha kar hum ko

sad hota nahin sarkar mein chehra apna

kis ke hathon hadaf-e-tir-e-bala hum na hue

dil hai manind-e-kaman sab se kashida apna

dil-jale dud-e-pareshan ki tarah hain barbaad

hum kahin Thahren to batlaen Thikana apna

kaun mushtaq hai hum dagh dikhaen kis ko

dekhen KHud surat-e-taus tamasha apna

sharm bande ki tere hath hai ai rabb-e-karim

na khule KHak ke parde mein bhi parda apna

hum ko jo ranj pahunchte hain wo kis se kahiye

hum ko mehman samajhti nahin duniya apna

zindagi chahiye jangal mein bhi kuchh KHauf nahin

ai junun sher ka aaKHir kabhi ghar tha apna

turfa KHushki-o-tari ki hai hamein sair ai 'bahr'

dasht hai apna ghubar ashk hai dariya apna