qafas khola tha maine aaj jab panchhi uDane ko

qafas kholā thā maiñ ne aaj jab panchhī uḌāne ko

parinda ruk gayā ik jail ke qissa sunāne ko

ye tanhā.ī ghuTan aur bebasī kamre meñ phailī hai

rakhī thī chhat pe āñkheñ do kabhī ham ne sukhāne ko

daraḳhtoñ kī vo parchhā.ī vo āñgan kā khulā honā

kahāñ aatī hai ab chiḌiyā gharoñ meñ chahchahāne ko

mire pairoñ kī ye zanjīr us pal chhan-chhanā uThī

hilāyā pair jab bhī ḳhvāb meñ paa.el bajāne ko

ḳhamoshī ye mere andar kī shab bhar raqs kartī hai

maiñ gaatī loriyāñ aur thapkiyāñ detī sulāne ko

ga.ī thī āsmāñ pe maiñ jo chhūne chāñd aur taare

faqat jugnū lage haiñ haath mere jagmagāne ko

kitāboñ se yaqīnan jī 'hiyā' ab bhar gayā hogā

vo muddat baad lauTā hai mirā dar khaTkhaTāne ko

qafas khola tha main ne aaj jab panchhi uDane ko

parinda ruk gaya ek jail ke qissa sunane ko

ye tanhai ghuTan aur bebasi kamre mein phaili hai

rakhi thi chhat pe aankhen do kabhi hum ne sukhane ko

daraKHton ki wo parchhai wo aangan ka khula hona

kahan aati hai ab chiDiya gharon mein chahchahane ko

mere pairon ki ye zanjir us pal chhan-chhana uThi

hilaya pair jab bhi KHwab mein pael bajaane ko

KHamoshi ye mere andar ki shab bhar raqs karti hai

main gati loriyan aur thapkiyan deti sulane ko

gai thi aasman pe main jo chhune chand aur tare

faqat jugnu lage hain hath mere jagmagane ko

kitabon se yaqinan ji 'hiya' ab bhar gaya hoga

wo muddat baad lauTa hai mera dar khaTkhaTane ko