qafas se chhuTne pe shad the hum ki lazzat-e-zindagi milegi

qafas se chhuTne pe shaad the ham ki lazzat-e-zindagī milegī

ye kyā ḳhabar thī bahār-e-gulshan lahū meñ Duubī huī milegī

jin ahl-e-himmat ke rāstoñ meñ bichhā.e jaate haiñ aaj kāñTe

unhī ke ḳhūn-e-jigar se rañgīñ chaman kī har ik kalī milegī

vo din bhī the jab añdherī rātoñ meñ bhī qadam rāh-e-rāst par the

aur aaj jab raushnī milī hai to ziist bhaTkī huī milegī

na.ī sahar ke hasīn sūraj tujhe ġharīboñ se vāsta kyā

jahāñ ujālā hai sīm-o-zar kā vahīñ tirī raushnī milegī

kabhī to nasl-o-vatan-parastī kī tīrgī ko shikast hogī

kabhī to shām-e-alam miTegī kabhī to sub.h-e-ḳhushī milegī

vo ham nahīñ haiñ ki sirf apne hī ghar meñ sham.eñ jalā ke baiTheñ

vahāñ vahāñ raushnī kareñge jahāñ jahāñ tīrgī milegī

talāsh-e-manzil kā azm-e-mohkam dalīl-e-manzil-rasī hai 'zāhid'

qadam to apne baḌhāo aage khulī huī raah bhī milegī

qafas se chhuTne pe shad the hum ki lazzat-e-zindagi milegi

ye kya KHabar thi bahaar-e-gulshan lahu mein Dubi hui milegi

jin ahl-e-himmat ke raston mein bichhae jate hain aaj kanTe

unhi ke KHun-e-jigar se rangin chaman ki har ek kali milegi

wo din bhi the jab andheri raaton mein bhi qadam rah-e-rast par the

aur aaj jab raushni mili hai to zist bhaTki hui milegi

nai sahar ke hasin suraj tujhe gharibon se wasta kya

jahan ujala hai sim-o-zar ka wahin teri raushni milegi

kabhi to nasl-o-watan-parasti ki tirgi ko shikast hogi

kabhi to sham-e-alam miTegi kabhi to subh-e-KHushi milegi

wo hum nahin hain ki sirf apne hi ghar mein shamen jala ke baiThen

wahan wahan raushni karenge jahan jahan tirgi milegi

talash-e-manzil ka azm-e-mohkam dalil-e-manzil-rasi hai 'zahid'

qadam to apne baDhao aage khuli hui rah bhi milegi