qahr hai maut hai qaza hai ishq

qahr hai maut hai qazā hai ishq

sach to yuuñ hai burī balā hai ishq

asar-e-ġham zarā batā denā

vo bahut pūchhte haiñ kyā hai ishq

āfat-e-jāñ hai koī parda-nashīñ

ki mire dil meñ aa chhupā hai ishq

bul-havas aur lāf-e-jāñ-bāzī

khel kaisā samajh liyā hai ishq

vasl meñ ehtimāl-e-shādi-e-marg

chārāgar dard-e-be-davā hai ishq

sūjhe kyūñkar fareb-e-dildārī

dushman-āshnā-numā hai ishq

kis malāhat-sirisht ko chāhā

talḳh-kāmī pe bā-mazā hai ishq

ham ko tarjīh tum pe hai yaanī

dilrubā husn o jāñ-rubā hai ishq

dekh hālat mirī kaheñ kāfir

naam dozaḳh kā kyuuñ dharā hai ishq

dekhiye kis jagah Dubo degā

merī kashtī kā nāḳhudā hai ishq

ab to dil ishq kā mazā chakkhā

ham na kahte the kyuuñ burā hai ishq

aap mujh se nibāheñge sach hai

bā-vafā husn o bevafā hai ishq

maiñ vo majnūn-e-vahshat-ārā huuñ

naam se mere bhāgtā hai ishq

qais o farhād o vāmiq o 'momin'

mar ga.e sab hī kyā vabā hai ishq

qahr hai maut hai qaza hai ishq

sach to yun hai buri bala hai ishq

asar-e-gham zara bata dena

wo bahut puchhte hain kya hai ishq

aafat-e-jaan hai koi parda-nashin

ki mere dil mein aa chhupa hai ishq

bul-hawas aur laf-e-jaan-bazi

khel kaisa samajh liya hai ishq

wasl mein ehtimal-e-shadi-e-marg

chaaragar dard-e-be-dawa hai ishq

sujhe kyunkar fareb-e-dildari

dushman-ashna-numa hai ishq

kis malahat-sirisht ko chaha

talKH-kaami pe ba-maza hai ishq

hum ko tarjih tum pe hai yani

dilruba husn o jaan-ruba hai ishq

dekh haalat meri kahen kafir

nam dozaKH ka kyun dhara hai ishq

dekhiye kis jagah Dubo dega

meri kashti ka naKHuda hai ishq

ab to dil ishq ka maza chakkha

hum na kahte the kyun bura hai ishq

aap mujh se nibahenge sach hai

ba-wafa husn o bewafa hai ishq

main wo majnun-e-wahshat-ara hun

nam se mere bhagta hai ishq

qais o farhad o wamiq o 'momin'

mar gae sab hi kya waba hai ishq