qahr kaisa subh-dam baad-e-bahaari kar gai

qahr kaisā sub.h-dam bād-e-bahārī kar ga.ī

phuul barsānā the dil par sho.ala-bārī kar ga.ī

tishna-e-takmīl ik muddat se thā zauq-e-junūñ

kaam kuchh to dostoñ kī sañg-bārī kar ga.ī

jis qadar jhukte ga.e hote ga.e ham sar-buland

rif.atoñ se āshnā ye ḳhāksārī kar ga.ī

ham gunahgāroñ ko rahmat kī kahāñ ummīd thī

mustahiq lekin hamārī sharmsārī kar ga.ī

har varaq dīvān-e-dil kā naqsh-e-mānī hai 'bahār'

nok-e-mizhgāñ dekhiye kyā husn-kārī kar ga.ī

qahr kaisa subh-dam baad-e-bahaari kar gai

phul barsana the dil par shoala-bari kar gai

tishna-e-takmil ek muddat se tha zauq-e-junun

kaam kuchh to doston ki sang-bari kar gai

jis qadar jhukte gae hote gae hum sar-buland

rifaton se aashna ye KHaksari kar gai

hum gunahgaron ko rahmat ki kahan ummid thi

mustahiq lekin hamari sharmsari kar gai

har waraq diwan-e-dil ka naqsh-e-mani hai 'bahaar'

nok-e-mizhgan dekhiye kya husn-kari kar gai