qalam KHamosh hai alfaz ki tasir bole hai

qalam ḳhāmosh hai alfāz kī tāsīr bole hai

hamārī safha-e-qirtās par tahrīr bole hai

ḳhudārā ab mujhe āzād kar do qaid-e-paiham se

machal kar paañv meñ lipTī huī zanjīr bole hai

ajab me.amār haiñ jin kī samajh meñ ye nahīñ aatā

imārat kitnī mustahkam hai ḳhud ta.amīr bole hai

yahī mahsūs hotā hai ajantā kī guphāoñ meñ

ki har tasvīr to chup hai fan-e-tasvīr bole hai

haqīqat miT nahīñ saktī badal dene se tārīḳheñ

har ik fan meñ hamārā husn-e-ālam-gīr bole hai

karishma ye nahīñ to aur kyā hai ḳhūn-e-nāhaq kā

hamārī be-gunāhī par yahāñ shamshīr bole hai

ḳhudā bande se kyā pūchhe vahāñ us kī razā 'rahbar'

hathelī kī lakīroñ meñ jahāñ taqdīr bole hai

qalam KHamosh hai alfaz ki tasir bole hai

hamari safha-e-qirtas par tahrir bole hai

KHudara ab mujhe aazad kar do qaid-e-paiham se

machal kar panw mein lipTi hui zanjir bole hai

ajab meamar hain jin ki samajh mein ye nahin aata

imarat kitni mustahkam hai KHud tamir bole hai

yahi mahsus hota hai ajanta ki guphaon mein

ki har taswir to chup hai fan-e-taswir bole hai

haqiqat miT nahin sakti badal dene se tariKHen

har ek fan mein hamara husn-e-alam-gir bole hai

karishma ye nahin to aur kya hai KHun-e-nahaq ka

hamari be-gunahi par yahan shamshir bole hai

KHuda bande se kya puchhe wahan us ki raza 'rahbar'

hatheli ki lakiron mein jahan taqdir bole hai