qalb-e-gham-KHurda ke haalat kise pesh karun

qalb-e-ġham-ḳhurda ke hālāt kise pesh karūñ

Thes khaa.e hue jazbāt kise pesh karūñ

aaheñ bharte hue lamhāt kise pesh karūñ

hasrat-o-yās ke din-rāt kise pesh karūñ

merī mahrūmī-e-qismat ye batā de mujh ko

apne armānoñ kī bārāt kise pesh karūñ

hashr meñ aaya huuñ maiñ tohfa-e-isyāñ le kar

sochtā huuñ ki ye sauġhāt kise pesh karūñ

hāsil-e-zīst haiñ duniyā meñ ḳharābāt mire

vaqt-e-ruḳhsat ye ḳharābāt kise pesh karūñ

kis ko dam-sāz karūñ apnī siyah-baḳhtī kā

ġham meñ Duubī huī ye raat kise pesh karūñ

raqs karte hue maiḳhāne pe chhā.e bādal

kaif-bar-dosh ye barsāt kise pesh karūñ

rū-e-raushan kā tasavvur kabhī zulfoñ kā ḳhayāl

din kise pesh karūñ raat kise pesh karūñ

aadmī ab bhī nahīñ jins-e-vafā se vāqif

maiñ vafāoñ kī ye sauġhāt kise pesh karūñ

jo zabāñ kī kabhī sharminda-e-ehsāñ na huī

'ja.afarī' dil kī vo ik baat kise pesh karūñ

qalb-e-gham-KHurda ke haalat kise pesh karun

Thes khae hue jazbaat kise pesh karun

aahen bharte hue lamhat kise pesh karun

hasrat-o-yas ke din-raat kise pesh karun

meri mahrumi-e-qismat ye bata de mujh ko

apne armanon ki baraat kise pesh karun

hashr mein aaya hun main tohfa-e-isyan le kar

sochta hun ki ye saughat kise pesh karun

hasil-e-zist hain duniya mein KHarabaat mere

waqt-e-ruKHsat ye KHarabaat kise pesh karun

kis ko dam-saz karun apni siyah-baKHti ka

gham mein Dubi hui ye raat kise pesh karun

raqs karte hue maiKHane pe chhae baadal

kaif-bar-dosh ye barsat kise pesh karun

ru-e-raushan ka tasawwur kabhi zulfon ka KHayal

din kise pesh karun raat kise pesh karun

aadmi ab bhi nahin jins-e-wafa se waqif

main wafaon ki ye saughat kise pesh karun

jo zaban ki kabhi sharminda-e-ehsan na hui

'jafari' dil ki wo ek baat kise pesh karun